ai dil ab aur koi qissa-e-duniya na suna

ai dil ab aur koī qissa-e-duniyā na sunā

chheḌ de zikr-e-vafā haañ koī afsāna sunā

ġhībat-e-dahr bahut gosh-e-gunahgār meñ hai

kuchh ġham-e-ishq ke ausāf-e-karīmāna sunā

kār-e-dīroz abhī āñkhoñ se kahāñ simTā hai

ḳhuuñ rulāne ke liye qissa-e-fardā na sunā

dāman-e-bād ko hai daulat-e-shabnam kaafī

ruuh ko zikr-e-tunuk-baḳhshi-e-dariyā na sunā

sunte haiñ us meñ vo jaada hai ki dil chiiz hai kyā

sunte haiñ us pe vo aalam hai ki dekhā na sunā

gosh-e-behosh vo kyā jis ne ki hañgām-e-navā

koī naala hī lab-e-nai se nikaltā na sunā

ham-nashīñ pardagi-e-rāz ise kahte haiñ

lab-e-sāġhar se kisī rind kā charchā na sunā

kuchh ajab chaal se jaatā hai zamāna ab ke

hashr dekhe haiñ magar hashr kā ġhauġhā na sunā

baḌh gayā roz-e-qayāmat se shab-e-ġham kā sukūt

jism-e-ādam meñ kahīñ dil hī dhaḌaktā na sunā

nauha-e-ġham koī us bazm meñ chheḌe kyūñkar

jis ne gītoñ ko bhī bā-ḳhātir-e-begāna sunā

ai dil ab aur koi qissa-e-duniya na suna

chheD de zikr-e-wafa han koi afsana suna

ghibat-e-dahr bahut gosh-e-gunahgar mein hai

kuchh gham-e-ishq ke ausaf-e-karimana suna

kar-e-diroz abhi aankhon se kahan simTa hai

KHun rulane ke liye qissa-e-farda na suna

daman-e-baad ko hai daulat-e-shabnam kafi

ruh ko zikr-e-tunuk-baKHshi-e-dariya na suna

sunte hain us mein wo jada hai ki dil chiz hai kya

sunte hain us pe wo aalam hai ki dekha na suna

gosh-e-behosh wo kya jis ne ki hangam-e-nawa

koi nala hi lab-e-nai se nikalta na suna

ham-nashin pardagi-e-raaz ise kahte hain

lab-e-saghar se kisi rind ka charcha na suna

kuchh ajab chaal se jata hai zamana ab ke

hashr dekhe hain magar hashr ka ghaugha na suna

baDh gaya roz-e-qayamat se shab-e-gham ka sukut

jism-e-adam mein kahin dil hi dhaDakta na suna

nauha-e-gham koi us bazm mein chheDe kyunkar

jis ne giton ko bhi ba-KHatir-e-begana suna