ai dost ek ajib sa manzar liye phira

ai dost ik ajiib sā manzar liye phirā

hoñToñ pe tishnagī kā samundar liye phirā

āb-e-hayāt pī na sake tishna-kām log

maiñ shāh-rah pe shīsha-o-sāġhar liye phirā

zahmat na kī samajhne kī ahl-e-dayār ne

apnī matā-e-fikr suḳhan-var liye phirā

terā ḳhayāl terā tasavvur tamām umr

mujh ko dayār-e-ġhair meñ dar dar liye phirā

hai vaqt kis ke paas ab itnā jo paḌh sake

afkār kā maiñ chehre pe daftar liye phirā

shāyad ki koī ek bhī pahchān le mujhe

maiñ apne is vajūd ko ghar ghar liye phirā

ik roz bhī na aaya koī haal pūchhne

maiñ apnā hāl-e-zār barābar liye phirā

lo ahl-e-kosh ho ga.e manzil se ham-kanār

kam-kosh sirf apnā muqaddar liye phirā

'āqib' zamīn tang huī ham pe dekhiye

har shaḳhs mere vāste patthar liye phirā

ai dost ek ajib sa manzar liye phira

honTon pe tishnagi ka samundar liye phira

aab-e-hayat pi na sake tishna-kaam log

main shah-rah pe shisha-o-saghar liye phira

zahmat na ki samajhne ki ahl-e-dayar ne

apni mata-e-fikr suKHan-war liye phira

tera KHayal tera tasawwur tamam umr

mujh ko dayar-e-ghair mein dar dar liye phira

hai waqt kis ke pas ab itna jo paDh sake

afkar ka main chehre pe daftar liye phira

shayad ki koi ek bhi pahchan le mujhe

main apne is wajud ko ghar ghar liye phira

ek roz bhi na aaya koi haal puchhne

main apna haal-e-zar barabar liye phira

lo ahl-e-kosh ho gae manzil se ham-kanar

kam-kosh sirf apna muqaddar liye phira

'aqib' zamin tang hui hum pe dekhiye

har shaKHs mere waste patthar liye phira