ai dost tujhse dur rahe ya qarin rahe

ai dost tujh se duur rahe yā qarīñ rahe

qismat thī ye sukūñ se kabhī bhī nahīñ rahe

vo kyoñ rah-e-hayāt meñ andoh-gīñ rahe

jis kī nazar meñ jalva-e-husn-e-yaqīñ rahe

aksar tumhārī bazm se palTe haiñ is tarah

mahsūs ye huā ki jahāñ the vahīñ rahe

hangāma-e-chaman se unheñ kuchh ġharaz nahīñ

dīvāne fasl-e-gul meñ bhī sahrā-nashīñ rahe

dhuñdlī sī ho ga.ī haiñ fazā.eñ hayāt kī

hadd-e-tasavvurāt meñ jab tum nahīñ rahe

me'yār hai vahī to kamāl-e-niyāz kā

is āstāñ pe kyoñ na hamārī jabīñ rahe

ā.īna-e-ḳhulūs meñ dhabbe na mil sake

'ājiz tamām 'umr mire nukta-chīñ rahe

har ik nigāh jis kī ho ḳhud nukta-āfrīñ

phir kyoñ ḳhayāl ḳhair kā vo ḳhosha-chīñ rahe

har talḳhī-e-zamāna thī kaif-āfrīñ mujhe

kam-bīñ the jo fidā-e-mai-o-angbīñ rahe

'ishrat' batā do rāz-e-mohabbat zamāne ko

duniyā meñ kyoñ ye kashmakash-e-kufr-o-dīñ rahe

ai dost tujh se dur rahe ya qarin rahe

qismat thi ye sukun se kabhi bhi nahin rahe

wo kyon rah-e-hayat mein andoh-gin rahe

jis ki nazar mein jalwa-e-husn-e-yaqin rahe

aksar tumhaari bazm se palTe hain is tarah

mahsus ye hua ki jahan the wahin rahe

hangama-e-chaman se unhen kuchh gharaz nahin

diwane fasl-e-gul mein bhi sahra-nashin rahe

dhundli si ho gai hain fazaen hayat ki

hadd-e-tasawwuraat mein jab tum nahin rahe

me'yar hai wahi to kamal-e-niyaz ka

is aastan pe kyon na hamari jabin rahe

aaina-e-KHulus mein dhabbe na mil sake

'ajiz tamam 'umr mere nukta-chin rahe

har ek nigah jis ki ho KHud nukta-afrin

phir kyon KHayal KHair ka wo KHosha-chin rahe

har talKHi-e-zamana thi kaif-afrin mujhe

kam-bin the jo fida-e-mai-o-angbin rahe

'ishrat' bata do raaz-e-mohabbat zamane ko

duniya mein kyon ye kashmakash-e-kufr-o-din rahe