ai falak ye kya hua apna yagana phir gaya

ai falak ye kyā huā apnā yagāna phir gayā

tū akelā kyā phirā saarā zamāna phir gayā

thī ḳhushī aane kī un ke aate aate rah ga.e

baḳht-e-bargashta bajā kar shādiyāna phir gayā

khāte the angūr piite the sharāb-e-arġhavāñ

haa.e vo saaqī phirā kyā āb-o-dāna phir gayā

vā.e-nākāmī rahe mahrūm vasl-e-yār se

apne ghar aaya bhī aur kar ke bahāna phir gayā

ai muġhannī is tirī āvāz-e-dilkash ke huzūr

gul haiñ sīna-chāk bulbul kā tarāna phir gayā

kūcha-e-gesū meñ jab pahuñchā dil-e-vahshat-zada

rū-ba-rū āñkhoñ ke apnī qaid-ḳhāna phir gayā

kahte haiñ ḳhalḳhāl pā-e-yār ke vaqt-e-ḳhirām

hashr phir hogā bapā gar ik bhī daana phir gayā

uḌ gayā jab tausan-e-jazb apnā un ke hijr meñ

kī na jumbish us ne rū-e-tāziyāna phir gayā

terī nazroñ se girā jab se koī pursāñ nahīñ

tū phirā 'shaidā' se kyā saarā zamāna phir gayā

ai falak ye kya hua apna yagana phir gaya

tu akela kya phira sara zamana phir gaya

thi KHushi aane ki un ke aate aate rah gae

baKHt-e-bargashta baja kar shadiyana phir gaya

khate the angur pite the sharab-e-arghawan

hae wo saqi phira kya aab-o-dana phir gaya

wae-nakaami rahe mahrum wasl-e-yar se

apne ghar aaya bhi aur kar ke bahana phir gaya

ai mughanni is teri aawaz-e-dilkash ke huzur

gul hain sina-chaak bulbul ka tarana phir gaya

kucha-e-gesu mein jab pahuncha dil-e-wahshat-zada

ru-ba-ru aankhon ke apni qaid-KHana phir gaya

kahte hain KHalKHal pa-e-yar ke waqt-e-KHiram

hashr phir hoga bapa gar ek bhi dana phir gaya

uD gaya jab tausan-e-jazb apna un ke hijr mein

ki na jumbish us ne ru-e-taziyana phir gaya

teri nazron se gira jab se koi pursan nahin

tu phira 'shaida' se kya sara zamana phir gaya