ai ham-nafas us zulf ke afsane ko mat chheD

ai ham-nafas us zulf ke afsāne ko mat chheḌ

bas silsila jumbāñ na ho dīvāne ko mat chheḌ

jis rañg se hai dil meñ mire ishq ruḳh-e-yār

nāseh na ho dīvāna parī-ḳhāne ko mat chheḌ

vo sham-e-majālis to hai fānūs meñ raushan

ai ishq tū mujh soḳhta parvāne ko mat chheḌ

to aap hai paimāñ-shikan is daur meñ saaqī

kahtā hai mujhe bazm meñ paimāne ko mat chheḌ

tarvār se kyā ham ko Darātā hai miyāñ jā

yaañ aap se maujūd haiñ mar jaane ko mat chheḌ

hamdam na kah us vaqt ki bose kī talab kar

majlis meñ mujhe gāliyāñ dilvāne ko mat chheḌ

manzūr agar chheḌ hañsī kī hai to pyāre

hote 'muhib' apne ke to begāne ko mat chheḌ

ai ham-nafas us zulf ke afsane ko mat chheD

bas silsila jumban na ho diwane ko mat chheD

jis rang se hai dil mein mere ishq ruKH-e-yar

naseh na ho diwana pari-KHane ko mat chheD

wo sham-e-majalis to hai fanus mein raushan

ai ishq tu mujh soKHta parwane ko mat chheD

to aap hai paiman-shikan is daur mein saqi

kahta hai mujhe bazm mein paimane ko mat chheD

tarwar se kya hum ko Daraata hai miyan ja

yan aap se maujud hain mar jaane ko mat chheD

hamdam na kah us waqt ki bose ki talab kar

majlis mein mujhe galiyan dilwane ko mat chheD

manzur agar chheD hansi ki hai to pyare

hote 'muhib' apne ke to begane ko mat chheD