ai ham-safaro kyun na naya shahr basa len

ai ham-safaro kyuuñ na nayā shahr basā leñ

apne hī usuul apnī hī aqdār banā leñ

jin logoñ ne ab tak mire hoñToñ ko siyā hai

sozan se mirī soch kā kāñTā bhī nikāleñ

barfoñ pe alaav nahīñ lagte haiñ to yaaro

bujhtī huī qindīl se qindīl jalā leñ

kahne ko to bāzār kī ham jins-e-girāñ haiñ

lekin hameñ kauḌī pe ḳharīdār uThā leñ

bojh apnā bhī ham se to uThāyā nahīñ jaatā

aur aap musir aap kā bhī bojh uThā leñ

ai ham-safaro kyun na naya shahr basa len

apne hi usul apni hi aqdar bana len

jin logon ne ab tak mere honTon ko siya hai

sozan se meri soch ka kanTa bhi nikalen

barfon pe alaw nahin lagte hain to yaro

bujhti hui qindil se qindil jala len

kahne ko to bazar ki hum jins-e-giran hain

lekin hamein kauDi pe KHaridar uTha len

bojh apna bhi hum se to uThaya nahin jata

aur aap musir aap ka bhi bojh uTha len