ai hazrat-e-isa nahin kuchh ja-e-suKHan ab

ai hazrat-e-īsā nahīñ kuchh jā-e-suḳhan ab

vo aa ga.e rakhvā.iye tah kar ke kafan ab

sīñchā gayā phūlā hai na.e sar se chaman ab

ashkoñ ne kiye sabz mire dāġh-e-kuhan ab

o shauq-e-asīrī khulī gesū kī shikan ab

tarseñge qafas ke liye murġhān-e-chaman ab

ḳhāmoshī ne mā'dūm kiyā aur dahan ab

tum hī kaho baaqī rahī kyā jā-e-suḳhan ab

yārān-e-vatan ko hai ġharīboñ se kināra

ġhurbat kā taqāzā hai karo tark-e-vatan ab

derīna sitam-kash huuñ zamāne meñ azal se

kyā jaur nikālegā na.e charḳh-e-kuhan ab

sun lījiye kuchh qissa-e-betābī-e-dil ko

jo jī meñ ho kah lījiye phir mushfiq-e-man ab

sīmāb banāyā tap-e-hijrāñ ne jigar ko

dil Thahrne detī nahīñ siine kī jalan ab

ban ban ke sañvarte haiñ bigaḌ jaate haiñ ban kar

niklā hai na.ī sāḳht kā be-sāḳhta-pan ab

chalte sar-e-bāzār ho ġhairoñ ko parakhte

baTTā na lagā.e kahīñ ye chāl-chalan ab

zanjīr mirī toḌ dī ai joshish-e-vahshat

phir sar pe chaḌhā chāhtā hai najd kā ban ab

āḳhir koī had bhī tirī ai dūri-e-ġhurbat

māyūs hue jaate haiñ yārān-e-vatan ab

phir siine meñ paikāñ na samāyā ho kisī kā

kyā baat hai khulte nahīñ zaḳhmoñ ke dahan ab

kyā misr ke yūsuf ke kueñ jhāñk liye haiñ

dikhlā do zuleḳhā ko zarā chāh-e-zakan ab

hangāma-e-mahshar meñ ḳhamoshī hai kahāñ kī

sunñe kā nahīñ koī yahāñ uzr-e-dahan ab

kyā ruḳh pe bahār aa.ī na.e sabza-e-ḳhat se

tab ġhairat-e-gul the to hue rashk-e-chaman ab

muddat se gayā qais-e-sitam-kash kā zamāna

paidā to kare mujh sā koī charḳh-e-kuhan ab

pahuñchā na kabhī kaan talak nāla-e-majnūñ

chillā.ūñ agar guuñj uThe najd kā ban ab

kyā fikr hai ai 'sho.ala' piyo bāda-e-rangīñ

Daalo bhī kahīñ bhaaḌ meñ ye ranj-o-mehan ab

ai hazrat-e-isa nahin kuchh ja-e-suKHan ab

wo aa gae rakhwaiye tah kar ke kafan ab

sincha gaya phula hai nae sar se chaman ab

ashkon ne kiye sabz mere dagh-e-kuhan ab

o shauq-e-asiri khuli gesu ki shikan ab

tarsenge qafas ke liye murghan-e-chaman ab

KHamoshi ne ma'dum kiya aur dahan ab

tum hi kaho baqi rahi kya ja-e-suKHan ab

yaran-e-watan ko hai gharibon se kinara

ghurbat ka taqaza hai karo tark-e-watan ab

derina sitam-kash hun zamane mein azal se

kya jaur nikalega nae charKH-e-kuhan ab

sun lijiye kuchh qissa-e-betabi-e-dil ko

jo ji mein ho kah lijiye phir mushfiq-e-man ab

simab banaya tap-e-hijran ne jigar ko

dil Thahrne deti nahin sine ki jalan ab

ban ban ke sanwarte hain bigaD jate hain ban kar

nikla hai nai saKHt ka be-saKHta-pan ab

chalte sar-e-bazar ho ghairon ko parakhte

baTTa na lagae kahin ye chaal-chalan ab

zanjir meri toD di ai joshish-e-wahshat

phir sar pe chaDha chahta hai najd ka ban ab

aaKHir koi had bhi teri ai duri-e-ghurbat

mayus hue jate hain yaran-e-watan ab

phir sine mein paikan na samaya ho kisi ka

kya baat hai khulte nahin zaKHmon ke dahan ab

kya misr ke yusuf ke kuen jhank liye hain

dikhla do zuleKHa ko zara chah-e-zakan ab

hangama-e-mahshar mein KHamoshi hai kahan ki

sunne ka nahin koi yahan uzr-e-dahan ab

kya ruKH pe bahaar aai nae sabza-e-KHat se

tab ghairat-e-gul the to hue rashk-e-chaman ab

muddat se gaya qais-e-sitam-kash ka zamana

paida to kare mujh sa koi charKH-e-kuhan ab

pahuncha na kabhi kan talak nala-e-majnun

chillaun agar gunj uThe najd ka ban ab

kya fikr hai ai 'shoala' piyo baada-e-rangin

Dalo bhi kahin bhaD mein ye ranj-o-mehan ab