ai hazrat-e-isa nahin kuchh ja-e-suKHan ab

ai hazrat-e-īsā nahīñ kuchh jā-e-suḳhan ab

vo aa ga.e rakhvā.iye tah kar ke kafan ab

sīñchā gayā phūlā hai na.e sar se chaman ab

ashkoñ ne kiye sabz mire dāġh-e-kuhan ab

vo shauq-e-asīrī khule gesū ke shikan ab

tarseñge qafas ke liye murġhān-e-chaman ab

ḳhāmoshī ne mā'dūm kiyā aur dahan ab

tum hī kaho baaqī rahī kyā jā-e-suḳhan ab

yārān-e-vatan ko hai ġharīboñ se kināra

ġhurbat kā taqāzā hai karo tark-e-vatan ab

sun lījiye kuchh qissa-e-betābī-e-dil ko

jo jī meñ ho kah lījiye phir mushfiq-e-man ab

sīmāb banāyā but-e-hijrāñ ne jigar ko

dil Thaharne detī nahīñ siina kī jalan ab

āḳhir koī had bhī tirī ai dūri-e-ġhurbat

māyūs hue jaate haiñ yārān-e-vatan ab

kyā fikr hai ai 'shola' piyo bāda-e-rañgīñ

Daalo bhī kahīñ bhaaḌ meñ ye ranj-o-mehan ab

ai hazrat-e-isa nahin kuchh ja-e-suKHan ab

wo aa gae rakhwaiye tah kar ke kafan ab

sincha gaya phula hai nae sar se chaman ab

ashkon ne kiye sabz mere dagh-e-kuhan ab

wo shauq-e-asiri khule gesu ke shikan ab

tarsenge qafas ke liye murghan-e-chaman ab

KHamoshi ne ma'dum kiya aur dahan ab

tum hi kaho baqi rahi kya ja-e-suKHan ab

yaran-e-watan ko hai gharibon se kinara

ghurbat ka taqaza hai karo tark-e-watan ab

sun lijiye kuchh qissa-e-betabi-e-dil ko

jo ji mein ho kah lijiye phir mushfiq-e-man ab

simab banaya but-e-hijran ne jigar ko

dil Thaharne deti nahin sina ki jalan ab

aaKHir koi had bhi teri ai duri-e-ghurbat

mayus hue jate hain yaran-e-watan ab

kya fikr hai ai 'shola' piyo baada-e-rangin

Dalo bhi kahin bhaD mein ye ranj-o-mehan ab