ai ishq-e-fitna-saman kar de tu hashr barpa

ai ishq-e-fitna-sāmāñ kar de tū hashr barpā

kyā ye nahīñ qayāmat aalam hai terā shaidā

dair-o-haram se niklo gar diid chāhte ho

paidā karo basīrat phir dekh lo tamāshā

ai dard tere qurbāñ kaisā masīh tū hai

vo bā.is-e-shifā hai hai dard naam jis kā

jis samt dekhtā huuñ jalva tirā ayaañ hai

merī nazar meñ aalam maz.har hai ek terā

ism-o-sifāt kā hai tere zuhūr har-sū

is kā yaqīñ hai mujh ko hai zaat terī yaktā

ranj-e-ḳhumār meñ huuñ ab rahm kar tū mujh par

saaqī pilā de mujh ko phir ek jām-e-sahbā

bas dhyān rakh tū is kā bas yaad rakh tū is kī

ai 'shād' duur rakkhe dil se tū hubb-e-duniyā

ai ishq-e-fitna-saman kar de tu hashr barpa

kya ye nahin qayamat aalam hai tera shaida

dair-o-haram se niklo gar did chahte ho

paida karo basirat phir dekh lo tamasha

ai dard tere qurban kaisa masih tu hai

wo bais-e-shifa hai hai dard nam jis ka

jis samt dekhta hun jalwa tera ayan hai

meri nazar mein aalam mazhar hai ek tera

ism-o-sifat ka hai tere zuhur har-su

is ka yaqin hai mujh ko hai zat teri yakta

ranj-e-KHumar mein hun ab rahm kar tu mujh par

saqi pila de mujh ko phir ek jam-e-sahba

bas dhyan rakh tu is ka bas yaad rakh tu is ki

ai 'shad' dur rakkhe dil se tu hubb-e-duniya