ai jahan gham ke siwa tujhse mila kuchh bhi nahin

ai jahāñ ġham ke sivā tujh se milā kuchh bhī nahīñ

maiñ pareshāñ to huā par hai gilā kuchh bhī nahīñ

jā paḌeñge vaañ havāoñ kā safar hogā jahāñ

zindagī mauj samundar ke sivā kuchh bhī nahīñ

jo muqaddar ne diyā us ko lagāyā hai gale

jo bichhaḌ ham se gayā us kī ḳhatā kuchh bhī nahīñ

baat kahne kī nahīñ aa to zarā sun to kabhī

mahfiloñ meñ hai mazā tere binā kuchh bhī nahīñ

ḳhvāb āñkhoñ meñ liye din ke ujāloñ meñ chalūñ

shab ki soyā thā ki jaagā thā patā kuchh bhī nahīñ

bas ḳhalāoñ se nazar aa.ī mirī duniyā use

vo samajhtā hai ki andar hai bapā kuchh bhī nahīñ

kaun se muñh se karoge ye bhalā ahd-e-vafā

tum ki kahte the ye pāband-e-vafā kuchh bhī nahīñ

bādaloñ ne jo kahā vo to sabhī ne hai sunā

bārishoñ ne jo kahā us ko sunā kuchh bhī nahīñ

dil-girafta hī sahī ḳhākī pashemāñ to nahīñ

ishq meñ ham ko mayassar jo huā kuchh bhī nahīñ

ai jahan gham ke siwa tujh se mila kuchh bhi nahin

main pareshan to hua par hai gila kuchh bhi nahin

ja paDenge wan hawaon ka safar hoga jahan

zindagi mauj samundar ke siwa kuchh bhi nahin

jo muqaddar ne diya us ko lagaya hai gale

jo bichhaD hum se gaya us ki KHata kuchh bhi nahin

baat kahne ki nahin aa to zara sun to kabhi

mahfilon mein hai maza tere bina kuchh bhi nahin

KHwab aankhon mein liye din ke ujalon mein chalun

shab ki soya tha ki jaga tha pata kuchh bhi nahin

bas KHalaon se nazar aai meri duniya use

wo samajhta hai ki andar hai bapa kuchh bhi nahin

kaun se munh se karoge ye bhala ahd-e-wafa

tum ki kahte the ye paband-e-wafa kuchh bhi nahin

baadalon ne jo kaha wo to sabhi ne hai suna

barishon ne jo kaha us ko suna kuchh bhi nahin

dil-girafta hi sahi KHaki pasheman to nahin

ishq mein hum ko mayassar jo hua kuchh bhi nahin