ai junun itna to kar waqt ata kam-az-kam

ai junūñ itnā to kar vaqt 'atā kam-az-kam

kar sakūñ tujh meñ izāfe kī du'ā kam-az-kam

apne rahne ke liye kuchh to jagah kar mujh meñ

gar haTānī nahīñ duniyā to ghaTā kam-az-kam

koī ilzām to sābit nahīñ kar paayā tū

kyā sazā soch ke rakkhī thī batā kam-az-kam

ġham-gusārī ke farā.ez to samajh le pahle

tere chehre pe ḳhushī hai vo chhupā kam-az-kam

terī tasvīr banāne meñ madad kar us kī

us musavvir ke liye rang banā kam-az-kam

maiñ agar khel huuñ to khelne kī koshish kar

maiñ tamāsha huuñ to phir dekhne aa kam-az-kam

terā jaanā ho agar yaad ke maiḳhāne meñ

to mire naam kā ik jaam uThā kam-az-kam

jaane kab se hai tū mehmān mirī āñkhoñ kā

terī āñkhoñ ko mere ḳhvāb dikhā kam-az-kam

tujh ko laḌnā tire dushman ne sikhāyā thā 'navā'

us kī turbat pe kuchh aañsū to bahā kam-az-kam

ai junun itna to kar waqt 'ata kam-az-kam

kar sakun tujh mein izafe ki du'a kam-az-kam

apne rahne ke liye kuchh to jagah kar mujh mein

gar haTani nahin duniya to ghaTa kam-az-kam

koi ilzam to sabit nahin kar paya tu

kya saza soch ke rakkhi thi bata kam-az-kam

gham-gusari ke faraez to samajh le pahle

tere chehre pe KHushi hai wo chhupa kam-az-kam

teri taswir banane mein madad kar us ki

us musawwir ke liye rang bana kam-az-kam

main agar khel hun to khelne ki koshish kar

main tamasha hun to phir dekhne aa kam-az-kam

tera jaana ho agar yaad ke maiKHane mein

to mere nam ka ek jam uTha kam-az-kam

jaane kab se hai tu mehman meri aankhon ka

teri aankhon ko mere KHwab dikha kam-az-kam

tujh ko laDna tere dushman ne sikhaya tha 'nawa'

us ki turbat pe kuchh aansu to baha kam-az-kam