ai junun wo gul khila sara chaman dekha kare

ai junūñ vo gul khilā saarā chaman dekhā kare

jab garebāñ chaak ho jaa.e bahār aayā kare

zulf-e-jānāñ jab sañvarne ke liye tarsā kare

abr-e-rahmat ham gunahgāroñ pe kyā saayā kare

aañkh khol ai mahv-e-ḳhud-bīnī kahīñ aisā na ho

ā.īna-ḳhānoñ meñ ā.īnoñ se Takrāyā kare

dekh kar kaalī ghaTā.eñ hosh kho dete haiñ log

apne gesū khol de koī to duniyā kyā kare

ḳhud-faroshī hai ba-alfāz-e-digar shukr-e-karam

aadmī kuchh soch kar to haath phailāyā kare

ab kahāñ sangīnī-e-hālāt se pahle kī baat

koī patthar mere shīshe se na Takrāyā kare

ab to is yaksāniyat se zindagī ghabrā ga.ī

jo hañsā hañstā rahe jo ro diyā royā kare

ai junun wo gul khila sara chaman dekha kare

jab gareban chaak ho jae bahaar aaya kare

zulf-e-jaanan jab sanwarne ke liye tarsa kare

abr-e-rahmat hum gunahgaron pe kya saya kare

aankh khol ai mahw-e-KHud-bini kahin aisa na ho

aaina-KHanon mein aainon se Takraya kare

dekh kar kali ghaTaen hosh kho dete hain log

apne gesu khol de koi to duniya kya kare

KHud-faroshi hai ba-alfaz-e-digar shukr-e-karam

aadmi kuchh soch kar to hath phailaya kare

ab kahan sangini-e-haalat se pahle ki baat

koi patthar mere shishe se na Takraya kare

ab to is yaksaniyat se zindagi ghabra gai

jo hansa hansta rahe jo ro diya roya kare