ai kashmakash-e-ulfat ji saKHt pareshan hai

ai kashmakash-e-ulfat jī saḳht pareshāñ hai

marne kī bhī hasrat hai jiine kā bhī armāñ hai

sāhil se nahīñ lagtī ġharqāb nahīñ hotī

kashtī hai thapeḌoñ meñ ye bhī koī tūfāñ hai

maiñ kyā mirī ulfat kyā tū aur mujhe pūchhe

bas ai sitam-ārā bas hasrat hai na armāñ hai

ye mauj-e-tabassum kyā zālim ise dho degī

jo rañg-e-pashemānī chehra se numāyāñ hai

maġhrūr-e-mohabbat huuñ ḳhud merī nigāhoñ meñ

ye be-sar-o-sāmānī rāz-e-sar-o-sāmāñ hai

is husn-e-mujassam kī sharmīlī adāoñ kā

ehsās-e-mohabbat bhī sharminda-e-ehsāñ hai

'manzūr' use ruḳhsat kis dil se karūñgā maiñ

dhaḌkā hai yahī har dam jab se ki vo mehmāñ hai

ai kashmakash-e-ulfat ji saKHt pareshan hai

marne ki bhi hasrat hai jine ka bhi arman hai

sahil se nahin lagti gharqab nahin hoti

kashti hai thapeDon mein ye bhi koi tufan hai

main kya meri ulfat kya tu aur mujhe puchhe

bas ai sitam-ara bas hasrat hai na arman hai

ye mauj-e-tabassum kya zalim ise dho degi

jo rang-e-pashemani chehra se numayan hai

maghrur-e-mohabbat hun KHud meri nigahon mein

ye be-sar-o-samani raaz-e-sar-o-saman hai

is husn-e-mujassam ki sharmili adaon ka

ehsas-e-mohabbat bhi sharminda-e-ehsan hai

'manzur' use ruKHsat kis dil se karunga main

dhaDka hai yahi har dam jab se ki wo mehman hai