ai KHuda ishq mein mehnat meri barbaad na ho

ai ḳhudā ishq meñ mehnat mirī barbād na ho

dil giraftār-e-vafā hai kahīñ āzād na ho

va.ada-e-vasl unheñ yaad dilā.ūñ to kaheñ

baat tum aisī kaho kyoñ jo mujhe yaad na ho

dil-e-āfat-zada ab dekh chukā aish ke din

ye vo vīrāna hai jo phir kabhī ābād na ho

dar qafas kā hai khulā kuchh sar-e-parvāz nahīñ

is qadar bhī asar-e-ulfat-e-sayyād na ho

jis ko tū lutf samajhtā hai sitam niklegā

ai dil āġhāz-e-mohabbat hai abhī shaad na ho

vasl ke zikr se kyā kaam samajh jā.ūñgā

ik ishārā hī sahī muñh se kuchh irshād na ho

zulm-e-be-jā se to ḳhud baaz nahīñ aate haiñ

aur mujh par hai ye tākīd ki fariyād na ho

tere qāmat ne uThā.ī hai qayāmat kaisī

mujh ko Dar hai ye koī misra-e-ustād na ho

aaj kyoñ naġhma-e-lai meñ hai fuġhāñ kā andāz

terī mahfil meñ kahīñ 'kaukab'-e-nāshād na ho

ai KHuda ishq mein mehnat meri barbaad na ho

dil giraftar-e-wafa hai kahin aazad na ho

wada-e-wasl unhen yaad dilaun to kahen

baat tum aisi kaho kyon jo mujhe yaad na ho

dil-e-afat-zada ab dekh chuka aish ke din

ye wo virana hai jo phir kabhi aabaad na ho

dar qafas ka hai khula kuchh sar-e-parwaz nahin

is qadar bhi asar-e-ulfat-e-sayyaad na ho

jis ko tu lutf samajhta hai sitam niklega

ai dil aaghaz-e-mohabbat hai abhi shad na ho

wasl ke zikr se kya kaam samajh jaunga

ek ishaara hi sahi munh se kuchh irshad na ho

zulm-e-be-ja se to KHud baz nahin aate hain

aur mujh par hai ye takid ki fariyaad na ho

tere qamat ne uThai hai qayamat kaisi

mujh ko Dar hai ye koi misra-e-ustad na ho

aaj kyon naghma-e-lai mein hai fughan ka andaz

teri mahfil mein kahin 'kaukab'-e-nashad na ho