ai mohabbat dekh tauhin-e-shakebai na ho

ai mohabbat dekh tauhīn-e-shakebā.ī na ho

merā kuchh bhī hashr ho bas un kī rusvā.ī na ho

ham se pūchho jalva-e-be-rang kī rangīniyāñ

ḳhaak dekheñgī vo āñkheñ jin meñ bīnā.ī na ho

kis ne dastak dī ye darvāze pe jā kar dekhnā

muzhda-e-fasl-e-bahārāñ sub.h-e-nau laa.ī na ho

ham-nashīñ parvarda-e-dard-o-alam hai merī zaat

kaun sī vo mauj hai jo mujh se Takrā.ī na ho

zindagī jaisā na hogā koī begāna-mizāj

ek muddat saath rah kar bhī shanāsā.ī na ho

tāzgī sī hai havāoñ meñ fazā meñ naġhmagī

ham-qafas sehn-e-gulistāñ meñ bahār aa.ī na ho

terā 'mūsā' ek aasī tū hai rahmān-o-rahīm

yā-ilāhī hashr ke din us kī rusvā.ī na ho

ai mohabbat dekh tauhin-e-shakebai na ho

mera kuchh bhi hashr ho bas un ki ruswai na ho

hum se puchho jalwa-e-be-rang ki ranginiyan

KHak dekhengi wo aankhen jin mein binai na ho

kis ne dastak di ye darwaze pe ja kar dekhna

muzhda-e-fasl-e-bahaaran subh-e-nau lai na ho

ham-nashin parwarda-e-dard-o-alam hai meri zat

kaun si wo mauj hai jo mujh se Takrai na ho

zindagi jaisa na hoga koi begana-mizaj

ek muddat sath rah kar bhi shanasai na ho

tazgi si hai hawaon mein faza mein naghmagi

ham-qafas sehn-e-gulistan mein bahaar aai na ho

tera 'musa' ek aasi tu hai rahman-o-rahim

ya-ilahi hashr ke din us ki ruswai na ho