ai mushfiq-e-man is haal mein tum kis tarah basar farmaoge

ai mushfiq-e-man is haal meñ tum kis tarah basar farmāoge

anjān bane chup baiThoge aur jaan ke dhoke khāoge

tum apne ghar ke añdhere meñ kyā dekhte ho dīvāroñ ko

ye sham.a kī sūrat jalnā kyā aa.egī havā bujh jāoge

jin jhūTe sachche ḳhvāboñ kī ta.abīr ġham-e-tanhā.ī hai

un jhūTe sachche ḳhvāboñ se tum kab tak dil bahlāoge

in dīda-o-dil kī rāhoñ par tum kis kī talāsh meñ phirte ho

jo khonā thā so kho baiThe kyā DhūñDoge kyā pāoge

chhoḌo bhī purānī bātoñ ko jo dil par biitī biit ga.ī

afsurda-dilī se tum kab tak har mahfil ko garmāoge

tum ḳhalvat-e-ġham se niklo to is shahr meñ aise log bhī haiñ

ik baar jo un ko dekhoge to dekhte hī rah jāoge

kuchh gard-e-safar ke rishte se kuchh naqsh-e-qadam ke naate se

jis raah se guzroge yaaro ham ko bhī vahīñ tum pāoge

mumkin hī nahīñ hai lafzoñ meñ is husn kī ho tafsīr koī

jab aañkh khule ḳhāmosh raho kyā samjhoge samjhāoge

jo pahle the ham vo aaj bhī haiñ pahchān hamārī āsāñ hai

tum ruup badal kar laakh phiro par kis kis ko jhuTlāoge

ai mushfiq-e-man is haal mein tum kis tarah basar farmaoge

anjaan bane chup baiThoge aur jaan ke dhoke khaoge

tum apne ghar ke andhere mein kya dekhte ho diwaron ko

ye shama ki surat jalna kya aaegi hawa bujh jaoge

jin jhuTe sachche KHwabon ki tabir gham-e-tanhai hai

un jhuTe sachche KHwabon se tum kab tak dil bahlaoge

in dida-o-dil ki rahon par tum kis ki talash mein phirte ho

jo khona tha so kho baiThe kya DhunDoge kya paoge

chhoDo bhi purani baaton ko jo dil par biti bit gai

afsurda-dili se tum kab tak har mahfil ko garmaoge

tum KHalwat-e-gham se niklo to is shahr mein aise log bhi hain

ek bar jo un ko dekhoge to dekhte hi rah jaoge

kuchh gard-e-safar ke rishte se kuchh naqsh-e-qadam ke nate se

jis rah se guzroge yaro hum ko bhi wahin tum paoge

mumkin hi nahin hai lafzon mein is husn ki ho tafsir koi

jab aankh khule KHamosh raho kya samjhoge samjhaoge

jo pahle the hum wo aaj bhi hain pahchan hamari aasan hai

tum rup badal kar lakh phiro par kis kis ko jhuTlaoge