ai nama-bar ulfat ka asar hai ki nahin hai

ai nāma-bar ulfat kā asar hai ki nahīñ hai

jo haal idhar hai vo udhar hai ki nahīñ hai

āsār to achchhe nahīñ ai shām-e-judā.ī

kyā jāniye qismat meñ sahar hai ki nahīñ hai

ab zikr hī kyā dard kā ai chashm-e-fusūñ-sāz

ye bhī nahīñ ma.alūm jigar hai ki nahīñ hai

vo kyā hai kahāñ hai ye patā pūchhne vaale

pahle ye batā apnī ḳhabar hai ki nahīñ hai

dīdār mubārak magar ai shauq-e-nazāra

guzrī thī jo kal pesh-e-nazar hai ki nahīñ hai

kyā kam haiñ jafāoñ se lagāvaT kī adā.eñ

ye zulm ba-andāz-e-digar hai ki nahīñ hai

'navvāb' ġham-e-ishq samā.egā kahāñ ab

kuchh shīsha-e-dil kī bhī ḳhabar hai ki nahīñ hai

ai nama-bar ulfat ka asar hai ki nahin hai

jo haal idhar hai wo udhar hai ki nahin hai

aasar to achchhe nahin ai sham-e-judai

kya jaaniye qismat mein sahar hai ki nahin hai

ab zikr hi kya dard ka ai chashm-e-fusun-saz

ye bhi nahin malum jigar hai ki nahin hai

wo kya hai kahan hai ye pata puchhne wale

pahle ye bata apni KHabar hai ki nahin hai

didar mubarak magar ai shauq-e-nazara

guzri thi jo kal pesh-e-nazar hai ki nahin hai

kya kam hain jafaon se lagawaT ki adaen

ye zulm ba-andaz-e-digar hai ki nahin hai

'nawwab' gham-e-ishq samaega kahan ab

kuchh shisha-e-dil ki bhi KHabar hai ki nahin hai