ai nish-e-ishq tere KHaridar kya hue

ai nīsh-e-ishq tere ḳharīdār kyā hue

thī jin ke dam se raunaq-e-bāzār kyā hue

bol ai havā-e-shām vo bīmār kyā hue

monis tire rafīq tire yaar kyā hue

ai jurm-e-ishq tere gunahgār kyā hue

ai dost tere hijr ke bīmār kyā hue

rasm-e-vafā kā zikr to ab zikr rah gayā

vo paikar-e-vafā vo vafādār kyā hue

ai kam-shanās vaqt tujhe yaad tak nahīñ

vo zaḳhm-e-jān-o-dil ke talabgār kyā hue

kār-e-junūñ meñ jin ke hue aam tazkire

fasl-e-junūñ batā vo ḳhud-āzār kyā hue

josh-o-nadīm-o-faiz bhī baiThe haiñ haar ke

pahuñche the jo junūñ meñ sar-e-dār kyā hue

zindān-e-tīrgī meñ muqayyad haiñ aaj bhī

paidā hue the sub.h ke āsār kyā hue

'vijdān' āshiqī meñ gañvānī thī jaan bhī

pyāre vo tere taur vo atvār kyā hue

ai nish-e-ishq tere KHaridar kya hue

thi jin ke dam se raunaq-e-bazar kya hue

bol ai hawa-e-sham wo bimar kya hue

monis tere rafiq tere yar kya hue

ai jurm-e-ishq tere gunahgar kya hue

ai dost tere hijr ke bimar kya hue

rasm-e-wafa ka zikr to ab zikr rah gaya

wo paikar-e-wafa wo wafadar kya hue

ai kam-shanas waqt tujhe yaad tak nahin

wo zaKHm-e-jaan-o-dil ke talabgar kya hue

kar-e-junun mein jin ke hue aam tazkire

fasl-e-junun bata wo KHud-azar kya hue

josh-o-nadim-o-faiz bhi baiThe hain haar ke

pahunche the jo junun mein sar-e-dar kya hue

zindan-e-tirgi mein muqayyad hain aaj bhi

paida hue the subh ke aasar kya hue

'wijdan' aashiqi mein ganwani thi jaan bhi

pyare wo tere taur wo atwar kya hue