ai rashk-e-parda-soz shikayat ki ja nahin

ai rashk-e-parda-soz shikāyat kī jā nahīñ

vo bazm-e-nāz hai dil-e-be-mudda.ā nahīñ

'beḳhud' ḳhayāl-e-yār meñ bū-e-vafā nahīñ

goyā ki ye kabhī mire dil meñ rahā nahīñ

sayyād qaid kar ke mujhe dekh le zarā

dil ḳhuuñ na ho to bulbul-e-ḳhūnīñ-navā nahīñ

allah rī be-niyāzī-e-āsūdgān-e-ḳhāk

is qurb par kisī se koī boltā nahīñ

nairangī-e-ḳhayāl se dhokā hai ġhair kā

kahtī hai shān-e-husn koī dūsrā nahīñ

aatī hai zarre zarre se āvāz-e-bāzgasht

phir bhī ye kah rahā hai abhī kuchh kahā nahīñ

shīrāza-band-e-dard-e-tasalsul hai zulf-e-yār

āġhāz-e-mudda.ā kī koī intihā nahīñ

hai jalva-rez-e-bazm-e-tasavvur jamāl-e-yār

ai chashm-e-shauq ab ye taġhāful ravā nahīñ

chingāriyāñ sī uḌne lagī haiñ nigāh meñ

kyoñ soz-gar ye terī kahīñ intihā nahīñ

mahrūmiyoñ se zauq hai nākāmiyoñ se ishq

maiñ kāmyāb huuñ ye mirā mudda.ā nahīñ

jaatī hai kū-e-majma.a-e-mahshar pe yaañ nazar

vo parda-e-hujūm-e-tamannā uThā nahīñ

yuuñ intihā-e-zo.af meñ hai shikva-e-jafā

goyā ye dil kabhī kā sitam-āshnā nahīñ

'beḳhud' hai be-niyāz koī ye bhī sun liyā

sharminda-e-qubūl hamārī duā nahīñ

ai rashk-e-parda-soz shikayat ki ja nahin

wo bazm-e-naz hai dil-e-be-muddaa nahin

'beKHud' KHayal-e-yar mein bu-e-wafa nahin

goya ki ye kabhi mere dil mein raha nahin

sayyaad qaid kar ke mujhe dekh le zara

dil KHun na ho to bulbul-e-KHunin-nawa nahin

allah ri be-niyazi-e-asudgan-e-KHak

is qurb par kisi se koi bolta nahin

nairangi-e-KHayal se dhoka hai ghair ka

kahti hai shan-e-husn koi dusra nahin

aati hai zarre zarre se aawaz-e-bazgasht

phir bhi ye kah raha hai abhi kuchh kaha nahin

shiraaza-band-e-dard-e-tasalsul hai zulf-e-yar

aaghaz-e-muddaa ki koi intiha nahin

hai jalwa-rez-e-bazm-e-tasawwur jamal-e-yar

ai chashm-e-shauq ab ye taghaful rawa nahin

chingariyan si uDne lagi hain nigah mein

kyon soz-gar ye teri kahin intiha nahin

mahrumiyon se zauq hai nakaamiyon se ishq

main kaamyab hun ye mera muddaa nahin

jati hai ku-e-majma-e-mahshar pe yan nazar

wo parda-e-hujum-e-tamanna uTha nahin

yun intiha-e-zoaf mein hai shikwa-e-jafa

goya ye dil kabhi ka sitam-ashna nahin

'beKHud' hai be-niyaz koi ye bhi sun liya

sharminda-e-qubul hamari dua nahin