ai sahab-e-waqt mujhko dekh kar Thahra na kar

ai sahāb-e-vaqt mujh ko dekh kar Thahrā na kar

dhuup sar par dā.imī hai aarzī saaya na kar

āshiqī shā.istagī-o-rāz-dārī kā hai naam

ḳhud bhī be-parvā na ho mujh ko bhī be-parvā na kar

zinda rahnā mohlat-e-imroz meñ hai zindagī

dosh-o-fardā kā ma.aal ai be-ḳhabar sochā na kar

ḳhāliq-e-manzil hai tū rakh apnī himmat par yaqīñ

rāste meñ naqsh-e-pā-e-rahnumā DhūñDā na kar

sādgī par maiñ tirī sau jaan se qurbān huuñ

yuuñ ba-andāz-tasanno.a sāmne aaya na kar

baad ke hāthoñ meñ kuchh kankar haiñ dasht-o-koh ke

narm miTTī se uge ai naḳhl sar ūñchā na kar

dhaḌkanoñ ke zer-o-bam se raaz ho jaate haiñ faash

ai dil-e-betāb is andāz se dhaḌkā na kar

āñkhoñ āñkhoñ meñ bayāñ kar har haqīqat 'rāz' kī

kaan dīvāroñ ke bhī hote haiñ lab kholā na kar

ai sahab-e-waqt mujh ko dekh kar Thahra na kar

dhup sar par daimi hai aarzi saya na kar

aashiqi shaistagi-o-raaz-dari ka hai nam

KHud bhi be-parwa na ho mujh ko bhi be-parwa na kar

zinda rahna mohlat-e-imroz mein hai zindagi

dosh-o-farda ka maal ai be-KHabar socha na kar

KHaliq-e-manzil hai tu rakh apni himmat par yaqin

raste mein naqsh-e-pa-e-rahnuma DhunDa na kar

sadgi par main teri sau jaan se qurban hun

yun ba-andaz-tasannoa samne aaya na kar

baad ke hathon mein kuchh kankar hain dasht-o-koh ke

narm miTTi se uge ai naKHl sar uncha na kar

dhaDkanon ke zer-o-bam se raaz ho jate hain fash

ai dil-e-betab is andaz se dhaDka na kar

aankhon aankhon mein bayan kar har haqiqat 'raaz' ki

kan diwaron ke bhi hote hain lab khola na kar