ai shaKHs dekh waqt hai ab bhi pukar le

ai shaḳhs dekh vaqt hai ab bhī pukār le

phir yuuñ na ho ki ham ko udāsī pukār le

ḳhud se farār paane ke us marhale pe haiñ

labbaik kah uTheñge koī bhī pukār le

dariyā ko hoñ pasañd to paanī hameñ bulā.e

sahrā ke man ko bhā.eñ to miTTī pukār le

ḳhushiyoñ meñ kis ko aatī hai bhūle huoñ kī yaad

shāyad ab us kī aañkh kā paanī pukār le

din to guzār aa.e haiñ sūraj-mukhī ke saath

ab chāhte haiñ raat kī raanī pukār le

kyā jāniye nasīb sañvar jaa.e kis ghaḌī

kyā jaane kab vo husn kī devī pukār le

tai kar ke jā chuke haiñ sabhī raat kā safar

ummīd hai ki sub.h mujhe bhī pukār le

ḳhud se farār paa.eñ to chain aa.e 'imtiyāz'

manzil nahīñ to rāhguzar hī pukār le

ai shaKHs dekh waqt hai ab bhi pukar le

phir yun na ho ki hum ko udasi pukar le

KHud se farar pane ke us marhale pe hain

labbaik kah uThenge koi bhi pukar le

dariya ko hon pasand to pani hamein bulae

sahra ke man ko bhaen to miTTi pukar le

KHushiyon mein kis ko aati hai bhule huon ki yaad

shayad ab us ki aankh ka pani pukar le

din to guzar aae hain suraj-mukhi ke sath

ab chahte hain raat ki rani pukar le

kya jaaniye nasib sanwar jae kis ghaDi

kya jaane kab wo husn ki dewi pukar le

tai kar ke ja chuke hain sabhi raat ka safar

ummid hai ki subh mujhe bhi pukar le

KHud se farar paen to chain aae 'imtiyaz'

manzil nahin to rahguzar hi pukar le