ai shuur-e-zindagi dil tera girwida bhi hai

ai shu.ūr-e-zindagī dil terā girvīda bhī hai

maslahat-koshī se lekin terī ġham-dīda bhī hai

apne ashkoñ kā maiñ hañs kar ḳhud uḌātā huuñ mazāq

zindagī bhar kā magar ġham in meñ poshīda bhī hai

TuuT kar dhoke se bhī bikhre ye mumkin hī nahīñ

dil mirā saada sahī lekin jahāñ-dīda bhī hai

shoḳhī-e-daurāñ se kah diije na chheḌe vo mujhe

merī fitrat meñ nihāñ ik shaḳhs sanjīda bhī hai

chand zarre merī palkoñ par chamak kar rah ga.e

varna ye dil ek sang-e-nā-tarāshīda bhī hai

kitne tūfāñ chand qatroñ se uThā saktā hai dil

tum agar kah do mirī ḳhātir to ranjīda bhī hai

zindagī guzrī hai yuuñ to sab havādis meñ magar

hai abhī ik hādisa aisā jo nādīda bhī he

hai mirī nazroñ meñ 'sāqib' vus.at-e-rāh-e-vafā

zulf-e-jānāñ kī tarah lekin vo pechīda bhī hai

ai shuur-e-zindagi dil tera girwida bhi hai

maslahat-koshi se lekin teri gham-dida bhi hai

apne ashkon ka main hans kar KHud uData hun mazaq

zindagi bhar ka magar gham in mein poshida bhi hai

TuT kar dhoke se bhi bikhre ye mumkin hi nahin

dil mera sada sahi lekin jahan-dida bhi hai

shoKHi-e-dauran se kah dije na chheDe wo mujhe

meri fitrat mein nihan ek shaKHs sanjida bhi hai

chand zarre meri palkon par chamak kar rah gae

warna ye dil ek sang-e-na-tarashida bhi hai

kitne tufan chand qatron se uTha sakta hai dil

tum agar kah do meri KHatir to ranjida bhi hai

zindagi guzri hai yun to sab hawadis mein magar

hai abhi ek hadisa aisa jo nadida bhi he

hai meri nazron mein 'saqib' wusat-e-rah-e-wafa

zulf-e-jaanan ki tarah lekin wo pechida bhi hai