ai yas mera ghar tera maskan to nahin hai

ai yaas mirā ghar tirā maskan to nahīñ hai

dil hai ye tamannāoñ kā madfan to nahīñ hai

kyā baat hai gulzār hai kyuuñ barq se mahfūz

be-barg mirī shāḳh-e-nasheman to nahīñ hai

haañ dīda-e-tahqīq se ai zauq-e-safar dekh

rahbar jise samjhā hai vo rahzan to nahīñ hai

taklīf asīrī kī shikāyat na kar ai dil

ye kunj-e-qafas kunj-e-nasheman to nahīñ hai

aao ki tamannāoñ meñ hai tāb-e-nazāra

ye dil hai mirā vādī-e-aiman to nahīñ hai

chhū kar hī jise ātish-e-dozaḳh huī ThanDī

dāman ye kisī riñd kā dāman to nahīñ hai

manzūr hai kuchh jāñch tire azm kī us ko

dar-asl zamāna tirā dushman to nahīñ hai

be-sa.ī-e-amal ḳhaak hai insān ko jiinā

ye razm-e-gah-e-zīst hai madfan to nahīñ hai

sayyād ijāzat ki zarā dekh to aa.uuñ

jaltā hai jo vo merā nasheman to nahīñ hai

dekho to rahā dasht-navardī pe jo nāzāñ

vo 'arsh' ravāñ jānib-e-gulshan to nahīñ hai

ai yas mera ghar tera maskan to nahin hai

dil hai ye tamannaon ka madfan to nahin hai

kya baat hai gulzar hai kyun barq se mahfuz

be-barg meri shaKH-e-nasheman to nahin hai

han dida-e-tahqiq se ai zauq-e-safar dekh

rahbar jise samjha hai wo rahzan to nahin hai

taklif asiri ki shikayat na kar ai dil

ye kunj-e-qafas kunj-e-nasheman to nahin hai

aao ki tamannaon mein hai tab-e-nazara

ye dil hai mera wadi-e-aiman to nahin hai

chhu kar hi jise aatish-e-dozaKH hui ThanDi

daman ye kisi rind ka daman to nahin hai

manzur hai kuchh jaanch tere azm ki us ko

dar-asl zamana tera dushman to nahin hai

be-sai-e-amal KHak hai insan ko jina

ye razm-e-gah-e-zist hai madfan to nahin hai

sayyaad ijazat ki zara dekh to aaun

jalta hai jo wo mera nasheman to nahin hai

dekho to raha dasht-nawardi pe jo nazan

wo 'arsh' rawan jaanib-e-gulshan to nahin hai