aib jo mujh mein hain mere hain hunar tera hai

aib jo mujh meñ haiñ mere haiñ hunar terā hai

maiñ musāfir huuñ magar zād-e-safar terā hai

tesha de de mire hāthoñ meñ to sābit kar duuñ

sīna-e-sañg meñ ḳhvābīda-sharar terā hai

tū ye kahtā hai samundar hai qalam-rau meñ mirī

maiñ ye kahtā huuñ ki maujoñ meñ asar terā hai

tū ne raushan kiye har taaq pe furqat ke charāġh

jis meñ tanhā.iyāñ rahtī haiñ vo ghar terā hai

sañg-reze to baraste haiñ mire āñgan meñ

jis kā har phal hai rasīlā vo shajar terā hai

maiñ to huuñ sañg-e-hidāyat kī tarah istāda

haañ magar zābta-e-rāhguzar terā hai

laakh be-māya huuñ itnā bhī tahī-dast nahīñ

merī āñkhoñ ke sadaf meñ ye guhar terā hai

mujh ko tanhā.ī se raġhbat tujhe hañgāmoñ se pyaar

zulmat-e-shab hai mirī nūr-e-sahar terā hai

Dūbte haiñ jo safīne ye ḳhatā kis kī hai

tah-nashīñ mauj mirī hai to bhañvar terā hai

'ramz' har tohmat-e-nā-karda se mansūb sahī

ye magar soch le us meñ bhī zarar terā hai

aib jo mujh mein hain mere hain hunar tera hai

main musafir hun magar zad-e-safar tera hai

tesha de de mere hathon mein to sabit kar dun

sina-e-sang mein KHwabida-sharar tera hai

tu ye kahta hai samundar hai qalam-rau mein meri

main ye kahta hun ki maujon mein asar tera hai

tu ne raushan kiye har taq pe furqat ke charagh

jis mein tanhaiyan rahti hain wo ghar tera hai

sang-reze to baraste hain mere aangan mein

jis ka har phal hai rasila wo shajar tera hai

main to hun sang-e-hidayat ki tarah istada

han magar zabta-e-rahguzar tera hai

lakh be-maya hun itna bhi tahi-dast nahin

meri aankhon ke sadaf mein ye guhar tera hai

mujh ko tanhai se raghbat tujhe hangamon se pyar

zulmat-e-shab hai meri nur-e-sahar tera hai

Dubte hain jo safine ye KHata kis ki hai

tah-nashin mauj meri hai to bhanwar tera hai

'ramz' har tohmat-e-na-karda se mansub sahi

ye magar soch le us mein bhi zarar tera hai