aib-o-hunar se khelne walon ke shahr mein

aib-o-hunar se khelne vāloñ ke shahr meñ

maiñ ghir gayā huuñ tang ḳhayāloñ ke shahr meñ

ham to siyāh-baḳht haiñ lekin ḳhatā muaaf

jo log gum hue haiñ ujāloñ ke shahr meñ

yā-rab ye kyā ki aur bhī begāna ho ga.e

aa kar vo apne chāhne vāloñ ke shahr meñ

vo ik javāb-e-talḳh dil-e-be-qarār ko

uljhā gayā hai kitne savāloñ ke shahr meñ

merā hī zikr kyā hai koī mutma.in nahīñ

is zindagī se khelne vāloñ ke shahr meñ

kyā baat hai har ek yahāñ tīra-zehn hai

baste haiñ kaise log ujāloñ ke shahr meñ

aatā nahīñ hai kūcha-e-dil kā bhī kuchh ḳhayāl

rahtā huuñ mahv kis ke ḳhayāloñ ke shahr meñ

chhā.ī hai murdanī sī ye kyoñ har taraf 'atīq'

jām-e-hayāt bāñTne vāloñ ke shahr meñ

aib-o-hunar se khelne walon ke shahr mein

main ghir gaya hun tang KHayalon ke shahr mein

hum to siyah-baKHt hain lekin KHata muaf

jo log gum hue hain ujalon ke shahr mein

ya-rab ye kya ki aur bhi begana ho gae

aa kar wo apne chahne walon ke shahr mein

wo ek jawab-e-talKH dil-e-be-qarar ko

uljha gaya hai kitne sawalon ke shahr mein

mera hi zikr kya hai koi mutmain nahin

is zindagi se khelne walon ke shahr mein

kya baat hai har ek yahan tira-zehn hai

baste hain kaise log ujalon ke shahr mein

aata nahin hai kucha-e-dil ka bhi kuchh KHayal

rahta hun mahw kis ke KHayalon ke shahr mein

chhai hai murdani si ye kyon har taraf 'atiq'

jam-e-hayat banTne walon ke shahr mein