ain-mumkin hai kisi tarz-e-ada mein aae

ain-mumkin hai kisī tarz-e-adā meñ aa.e

qissa-e-dard-e-vafā saut-o-sadā meñ aa.e

rut badalte hī na.e rañg ke manzar ubhre

kuchh parinde bhī na.ī mauj-e-havā meñ aa.e

ham to ā.īna-numā the hī safā-keshī meñ

naam kuchh aur bhī arbāb-e-safā meñ aa.e

ishq tā-hāl to matrūk nahīñ ho paayā

inqilābāt bhī go rāh-e-vafā meñ aa.e

kuchh gul-e-nīlofarī jhiil kī tārīkī se

apnī dānist meñ aqlīm-e-baqā meñ aa.e

kyā kaheñ us ko tazādāt-e-zamāna ke sivā

kitne darvesh the jo shāhī qabā meñ aa.e

ḳhvāb āñkhoñ meñ liye ham bhī ba-tā.īd-e-junūñ

kaise ik jalva-gah-e-ḳhvāb-numā meñ aa.e

shorish-e-ahd meñ ye tazkira-e-ishq-e-vafā

jaise naġhma sā koī bāñg-e-darā meñ aa.e

ḳhud ko gum kar ke kisī aur ke pā lene tak

marhale aur bhī takmīl-e-anā meñ aa.e

ain-mumkin hai kisi tarz-e-ada mein aae

qissa-e-dard-e-wafa saut-o-sada mein aae

rut badalte hi nae rang ke manzar ubhre

kuchh parinde bhi nai mauj-e-hawa mein aae

hum to aaina-numa the hi safa-keshi mein

nam kuchh aur bhi arbab-e-safa mein aae

ishq ta-haal to matruk nahin ho paya

inqilabaat bhi go rah-e-wafa mein aae

kuchh gul-e-nilofari jhil ki tariki se

apni danist mein aqlim-e-baqa mein aae

kya kahen us ko tazadat-e-zamana ke siwa

kitne darwesh the jo shahi qaba mein aae

KHwab aankhon mein liye hum bhi ba-taid-e-junun

kaise ek jalwa-gah-e-KHwab-numa mein aae

shorish-e-ahd mein ye tazkira-e-ishq-e-wafa

jaise naghma sa koi bang-e-dara mein aae

KHud ko gum kar ke kisi aur ke pa lene tak

marhale aur bhi takmil-e-ana mein aae