aisa gham hai ki jo kar dega mere baal safed

aisā ġham hai ki jo kar degā mire baal safed

aur vahshat bhī kuchh aisī ki hue gaal safed

maiñ ne pathrā.ī huī aañkh se ambar dekhā

aan kī aan huā tāroñ-bharā thaal safed

laash us shaḳhs ne mehnat se banāyā mujh ko

surḳh chādar ko mire sar se haTā Daal safed

aur phir niilā huā saare kā saarā manzar

maiñ ne dekhā thā kisī phuul pe rūmāl safed

ajnabī bantā hai kaise koī apnā pal meñ

kaise hotā hai ghaḌī-bhar meñ lahū laal safed

kaale kavve to bahut jhūTī ḳhabar dete haiñ

to kabūtar koī paiġhām-rasā paal safed

haa.e in phūloñ ne khā lī mire ghar kī raunaq

phuul bheje ga.e tohfe meñ to har saal safed

aisa gham hai ki jo kar dega mere baal safed

aur wahshat bhi kuchh aisi ki hue gal safed

main ne pathrai hui aankh se ambar dekha

aan ki aan hua taron-bhara thaal safed

lash us shaKHs ne mehnat se banaya mujh ko

surKH chadar ko mere sar se haTa Dal safed

aur phir nila hua sare ka sara manzar

main ne dekha tha kisi phul pe rumal safed

ajnabi banta hai kaise koi apna pal mein

kaise hota hai ghaDi-bhar mein lahu lal safed

kale kawwe to bahut jhuTi KHabar dete hain

to kabutar koi paigham-rasa pal safed

hae in phulon ne kha li mere ghar ki raunaq

phul bheje gae tohfe mein to har sal safed