aisa hua ki phulon ke chehre utar gae

aisā huā ki phūloñ ke chehre utar ga.e

maiñ ne ḳhizāñ kā naam liyā thā ki Dar ga.e

kuchh lamhe mujh ko aap se vābasta kar ga.e

phir is ke baa'd saiñkaḌoñ lamhe guzar ga.e

matlab se log milte haiñ ab aa ke aap se

be-laus dostī ke zamāne guzar ga.e

duniyā ne kyā kiyā ye koī jāntā nahīñ

ilzām saare ahl-e-mohabbat ke sar ga.e

jo ḳhvāb dekhte the sadā āsmānoñ ke

vo apne saath le ke ġham-e-bāl-o-par ga.e

sone ko tez aañch ne kundan banā diyā

merī nazar kī dhuup meñ jalve nikhar ga.e

mujh ko ġham-e-jahāñ ne hirāsāñ agar kiyā

yādoñ ke phuul kamre meñ mere bikhar ga.e

ye bahs thī añdheroñ kā kaise kareñ 'ilāj

itne meñ log apne hī saa.e se Dar ga.e

jo aate jaate dete the mujh ko du'ā-e-ḳhair

'fārūq' vo buzurg na jaane kidhar ga.e

aisa hua ki phulon ke chehre utar gae

main ne KHizan ka nam liya tha ki Dar gae

kuchh lamhe mujh ko aap se wabasta kar gae

phir is ke ba'd sainkaDon lamhe guzar gae

matlab se log milte hain ab aa ke aap se

be-laus dosti ke zamane guzar gae

duniya ne kya kiya ye koi jaanta nahin

ilzam sare ahl-e-mohabbat ke sar gae

jo KHwab dekhte the sada aasmanon ke

wo apne sath le ke gham-e-baal-o-par gae

sone ko tez aanch ne kundan bana diya

meri nazar ki dhup mein jalwe nikhar gae

mujh ko gham-e-jahan ne hirasan agar kiya

yaadon ke phul kamre mein mere bikhar gae

ye bahs thi andheron ka kaise karen 'ilaj

itne mein log apne hi sae se Dar gae

jo aate jate dete the mujh ko du'a-e-KHair

'faruq' wo buzurg na jaane kidhar gae