aisa lagta hai kisi gumbad se Takrai na thi

aisā lagtā hai kisī gumbad se Takrā.ī na thī

varna kab āvāz merī lauT kar aa.ī na thī

thā tirī qurbat kī āñkhoñ meñ har ik nashsha magar

niiñd se jaagī huī yādoñ kī añgḌā.ī na thī

ham ko andhā kar ga.ī thī ek gahrī raushnī

zulmatoñ kī zad meñ aa kar aañkh pathrā.ī na thī

qaid thā kyuuñ chāñd sadiyoñ se hisār-e-abr meñ

kyuuñ ujāloñ ne use poshāk pahnā.ī na thī

jal gayā apne hī andar kī harārat se badan

sūrajoñ ne ham pe koī aag barsā.ī na thī

tere siine meñ tirā ḳhuuñ barf kaise ho gayā

kyā tire andar harārat kī tavānā.ī na thī

aisa lagta hai kisi gumbad se Takrai na thi

warna kab aawaz meri lauT kar aai na thi

tha teri qurbat ki aankhon mein har ek nashsha magar

nind se jagi hui yaadon ki angDai na thi

hum ko andha kar gai thi ek gahri raushni

zulmaton ki zad mein aa kar aankh pathrai na thi

qaid tha kyun chand sadiyon se hisar-e-abr mein

kyun ujalon ne use poshak pahnai na thi

jal gaya apne hi andar ki hararat se badan

surajon ne hum pe koi aag barsai na thi

tere sine mein tera KHun barf kaise ho gaya

kya tere andar hararat ki tawanai na thi