aisa nahin humse kabhi laghzish nahin hoti

aisā nahīñ ham se kabhī laġhzish nahīñ hotī

par jhūTī kabhī ham se numā.ish nahīñ hotī

kaliyāñ bhī na.ī suukh ke murjhā ga.iiñ ab to

muddat se mire shahr meñ bārish nahīñ hotī

dhartī kabhī kāñpī kabhī ākāsh bhī larzā

ik shaḳhs ko lekin zarā jumbish nahīñ hotī

khodoge zamīñ roz to niklegā dafīna

koshish jise kahte haiñ vo koshish nahīñ hotī

maanā tire dar se koī ḳhālī nahīñ jaatā

'saifī' ye magar koī navāzish nahīñ hotī

aisa nahin hum se kabhi laghzish nahin hoti

par jhuTi kabhi hum se numaish nahin hoti

kaliyan bhi nai sukh ke murjha gain ab to

muddat se mere shahr mein barish nahin hoti

dharti kabhi kanpi kabhi aakash bhi larza

ek shaKHs ko lekin zara jumbish nahin hoti

khodoge zamin roz to niklega dafina

koshish jise kahte hain wo koshish nahin hoti

mana tere dar se koi KHali nahin jata

'saifi' ye magar koi nawazish nahin hoti