aisa nahin ki shoabada achchha nahin hua

aisā nahīñ ki sho.abada achchhā nahīñ huā

hairān yuuñ haiñ vo ki maiñ chauñkā nahīñ huā

hālāñki haar jiit usī par thī munhasir

lekin kabhī vo khel kā hissa nahīñ huā

vo raushnī bhī ek hī pal ke liye rukī

ham se bhī ain vaqt pe dar vā nahīñ huā

vo saḳht tīrgī thī ki sūraj ke saath saath

ham bhī jale agarche ujālā nahīñ huā

phir yuuñ huā ki ham hue duhrāo ke shikār

aur shā.erī meñ koī izāfa nahīñ huā

aisa nahin ki shoabada achchha nahin hua

hairan yun hain wo ki main chaunka nahin hua

haalanki haar jit usi par thi munhasir

lekin kabhi wo khel ka hissa nahin hua

wo raushni bhi ek hi pal ke liye ruki

hum se bhi ain waqt pe dar wa nahin hua

wo saKHt tirgi thi ki suraj ke sath sath

hum bhi jale agarche ujala nahin hua

phir yun hua ki hum hue duhrao ke shikar

aur shaeri mein koi izafa nahin hua