aisa nahin salam kiya aur guzar gae

aisā nahīñ salām kiyā aur guzar ga.e

jab bhī mile kisī se to dil meñ utar ga.e

zulm-o-sitam ke aage kabhī jo jhuke nahīñ

un ke nasīb un ke muqaddar sañvar ga.e

kirdār bech dene kā anjām ye huā

dil meñ utarne vaale nazar se utar ga.e

kuchh kaifiyat ajiib rahī apnī dosto

kī dostī kisī se to had se guzar ga.e

bachchoñ kī bhuuk maañ kī davā aur haath tañg

ye marhale bhī ham ko gunahgār kar ga.e

kuchh zindagī to mujh se masā.il ne chhīn lī

jo bach ga.ī thī hādse barbād kar ga.e

'sāhil' jab un ko koī Thikāna nahīñ milā

ġham un ke saare mere hī dil meñ Thahar ga.e

aisa nahin salam kiya aur guzar gae

jab bhi mile kisi se to dil mein utar gae

zulm-o-sitam ke aage kabhi jo jhuke nahin

un ke nasib un ke muqaddar sanwar gae

kirdar bech dene ka anjam ye hua

dil mein utarne wale nazar se utar gae

kuchh kaifiyat ajib rahi apni dosto

ki dosti kisi se to had se guzar gae

bachchon ki bhuk man ki dawa aur hath tang

ye marhale bhi hum ko gunahgar kar gae

kuchh zindagi to mujh se masail ne chhin li

jo bach gai thi hadse barbaad kar gae

'sahil' jab un ko koi Thikana nahin mila

gham un ke sare mere hi dil mein Thahar gae