aisa to yahan kuchh bhi nahin hadd-e-nazar tak

aisā to yahāñ kuchh bhī nahīñ hadd-e-nazar tak

ham ko to pahuñchnā thā kisī ḳhvāb-nagar tak

ab paañv nahīñ raah meñ dil thakne lagā hai

lekin hameñ chalnā to hai anjām-e-safar tak

ham shor bhī sunte haiñ samā.at se bahut kam

āvāz bhī jaatī hai to bas hadd-e-nazar tak

mumkin hai maiñ ab sabr kā ye peḌ girā duuñ

jab haath pahuñchtā hī nahīñ shāḳh-e-samar tak

ham apne hī mausam se parakhte haiñ jahāñ ko

māhaul kā lete hī nahīñ koī asar tak

maiñ apne hī andar kī taraf chīḳh rahā huuñ

ab dekhiye jaatī hai ye āvāz kidhar tak

aisa to yahan kuchh bhi nahin hadd-e-nazar tak

hum ko to pahunchna tha kisi KHwab-nagar tak

ab panw nahin rah mein dil thakne laga hai

lekin hamein chalna to hai anjam-e-safar tak

hum shor bhi sunte hain samaat se bahut kam

aawaz bhi jati hai to bas hadd-e-nazar tak

mumkin hai main ab sabr ka ye peD gira dun

jab hath pahunchta hi nahin shaKH-e-samar tak

hum apne hi mausam se parakhte hain jahan ko

mahaul ka lete hi nahin koi asar tak

main apne hi andar ki taraf chiKH raha hun

ab dekhiye jati hai ye aawaz kidhar tak