aise aabaad hun duniya mein ki barbaad hun main

aise ābād huuñ duniyā meñ ki barbād huuñ maiñ

dil mirā ḳhush hai magar mā.il-e-fariyād huuñ maiñ

maiñ giraftār parindoñ ko bhī āzād karūñ

aur duniyā ye samajhtī hai ki sayyād huuñ maiñ

log sīkheñge mohabbat ke salīqe mujh se

jān-e-jāñ rāñjhā-o-majnūñ kā bhī ustād huuñ maiñ

tū to shīrīñ ke kaf-e-pā ke barābar bhī nahīñ

kyā taqābul hai tirā mujh se ki farhād huuñ maiñ

'ishq ne hī mujhe jiine kā hunar baḳhshā hai

mat samajhnā ki yahāñ 'ishq meñ bedād huuñ maiñ

kyā lage koī mujhe yaad kare yā na kare

bas mujhe itnā hī kaafī hai use yaad huuñ maiñ

pūchh mat mujh se mire girya-o-mātam kā sabab

tere is tarh bichhaḌne pe hī nāshād huuñ maiñ

merā pūchhe jo pata koī batānā 'haidar'

us kī yādoñ ke hī ik shahr meñ ābād huuñ maiñ

aise aabaad hun duniya mein ki barbaad hun main

dil mera KHush hai magar mail-e-fariyaad hun main

main giraftar parindon ko bhi aazad karun

aur duniya ye samajhti hai ki sayyaad hun main

log sikhenge mohabbat ke saliqe mujh se

jaan-e-jaan ranjha-o-majnun ka bhi ustad hun main

tu to shirin ke kaf-e-pa ke barabar bhi nahin

kya taqabul hai tera mujh se ki farhad hun main

'ishq ne hi mujhe jine ka hunar baKHsha hai

mat samajhna ki yahan 'ishq mein bedad hun main

kya lage koi mujhe yaad kare ya na kare

bas mujhe itna hi kafi hai use yaad hun main

puchh mat mujh se mere girya-o-matam ka sabab

tere is tarh bichhaDne pe hi nashad hun main

mera puchhe jo pata koi batana 'haidar'

us ki yaadon ke hi ek shahr mein aabaad hun main