aise harjai se koi kis tarah yari kare

aise harjā.ī se koī kis tarah yaarī kare

bhuul kar apnoñ ko jo ġhairoñ kī ġham-ḳhvārī kare

sab ke aage to banā phirtā hai vo ma.asūm sā

jab hamāre sāmne aa.e to makkārī kare

vo clerkī se taraqqī pā ke afsar ho gayā

harkateñ lekin abhī tak vo bhī bāzārī kare

afsarī kī dhaak kyā kam thī ki shā.ir ho gayā

shā.ir-e-sarkār hai kyoñ kaam sarkārī kare

achchhe achchhe kī uchhal jaatī hai pagḌī ishq meñ

paas ho izzat kā jis ko jaage ghar-dārī kare

kis qadar majbūr hai insān roTī ke liye

ruup dhāre nit-na.e kaisī adākārī kare

ḳhud hī uksā.e sharī.at ke liye vo mard-e-haq

log jab māñgeñ sharī.at to hadeñ jaarī kare

gaañv vāloñ kā gila hai shahr vāloñ se 'azīm'

shahr vaale aish uḌā.eñ mehnateñ haarī kare

aise harjai se koi kis tarah yari kare

bhul kar apnon ko jo ghairon ki gham-KHwari kare

sab ke aage to bana phirta hai wo masum sa

jab hamare samne aae to makkari kare

wo clerki se taraqqi pa ke afsar ho gaya

harkaten lekin abhi tak wo bhi bazari kare

afsari ki dhak kya kam thi ki shair ho gaya

shair-e-sarkar hai kyon kaam sarkari kare

achchhe achchhe ki uchhal jati hai pagDi ishq mein

pas ho izzat ka jis ko jage ghar-dari kare

kis qadar majbur hai insan roTi ke liye

rup dhaare nit-nae kaisi adakari kare

KHud hi uksae shariat ke liye wo mard-e-haq

log jab mangen shariat to haden jari kare

ganw walon ka gila hai shahr walon se 'azim'

shahr wale aish uDaen mehnaten haari kare