aise hote hain sar-e-sham numudar charagh

aise hote haiñ sar-e-shām numūdār charāġh

jaise Dhalte hue sūraj ke azādār charāġh

ek hī aag meñ jalte haiñ yahāñ ham donoñ

mirā kirdār patangā tirā kirdār charāġh

karbalā aur bhalā kis ko yahāñ kahte haiñ

nok-e-neza pe hai sar aur sar-e-dār charāġh

kab kahāñ kaise parakhnā hai kisī ko ham ne

saare hālāt se rahte haiñ ḳhabar-dār charāġh

raushnī DhūñDhne sab log vahāñ jaate haiñ

ya.anī us paar añdherā hai to is paar charāġh

ḳhud hī āñdhī kī ināyat pe unheñ chhoḌ diyā

us pe phir ye bhī tamāsha hai ki be-kār charāġh

aise hote hain sar-e-sham numudar charagh

jaise Dhalte hue suraj ke azadar charagh

ek hi aag mein jalte hain yahan hum donon

mera kirdar patanga tera kirdar charagh

karbala aur bhala kis ko yahan kahte hain

nok-e-neza pe hai sar aur sar-e-dar charagh

kab kahan kaise parakhna hai kisi ko hum ne

sare haalat se rahte hain KHabar-dar charagh

raushni DhunDhne sab log wahan jate hain

yani us par andhera hai to is par charagh

KHud hi aandhi ki inayat pe unhen chhoD diya

us pe phir ye bhi tamasha hai ki be-kar charagh