aise mahaul mein mat puchh ki kya hota hai

aise māhaul meñ mat pūchh ki kyā hotā hai

sar pe jis vaqt tirā dast-e-atā hotā hai

mil ke ho jaatī hai uljhan ka.ī logoñ se mujhe

jaise ik sher bahut baar sunā hotā hai

bāñTte phirte haiñ har lahza duāoñ ke gulāb

ham faqīroñ ko bhalā kis se gila hotā hai

mas.ala ye hai sameTe koī chhāñv kaise

apnī fitrat meñ to har peḌ ghanā hotā hai

jis ko darkār rihā.ish ho mujhe batlā.e

hujra-e-chashm hama-vaqt khulā hotā hai

maiñ vo fānūs havā jis kī azal se dushman

maiñ vo maqtal huuñ jo har vaqt sajā hotā hai

us ghaḌī shauq se maiñ raqs kiyā kartā huuñ

jab koī misra tire lab se adā hotā hai

koī jitnī bhī bachāo kī tag-o-dau kar le

vaqt kā tiir kahāñ dost ḳhatā hotā hai

aise mahaul mein mat puchh ki kya hota hai

sar pe jis waqt tera dast-e-ata hota hai

mil ke ho jati hai uljhan kai logon se mujhe

jaise ek sher bahut bar suna hota hai

banTte phirte hain har lahza duaon ke gulab

hum faqiron ko bhala kis se gila hota hai

masala ye hai sameTe koi chhanw kaise

apni fitrat mein to har peD ghana hota hai

jis ko darkar rihaish ho mujhe batlae

hujra-e-chashm hama-waqt khula hota hai

main wo fanus hawa jis ki azal se dushman

main wo maqtal hun jo har waqt saja hota hai

us ghaDi shauq se main raqs kiya karta hun

jab koi misra tere lab se ada hota hai

koi jitni bhi bachao ki tag-o-dau kar le

waqt ka tir kahan dost KHata hota hai