aise nashe to karne ki aadat si ho gai

aise nashe to karne kī aadat sī ho ga.ī

ab baar baar marne kī aadat sī ho ga.ī

ranj-o-alam to chhoḌye ḳhushiyoñ meñ aaj kal

āñkhoñ meñ ashk bharne kī aadat sī ho ga.ī

marham hī ban gayā hai mire dard kā sabab

zaḳhmoñ ko'' yuuñ ubharne kī aadat sī ho ga.ī

har choT se maiñ aur nikhartā chalā gayā

mushkil meñ bhī sañvarne kī aadat sī ho ga.ī

kyā koī ās-pās hai yā hai gumāñ mujhe

yuuñ be-vajah Thaharne kī aadat sī ho ga.ī

jis raah se guzarnā kabhī nāgavār thā

us raah se guzarne kī aadat sī ho ga.ī

be-ḳhauf chal paḌe the mohabbat kī raah meñ

ab har qadam pe Darne kī aadat sī ho ga.ī

kaise chhuḌā.eñ rañg-e-mohabbat pattā nahīñ

har dil se to utarne kī aadat sī ho ga.ī

ab kaun mere dil meñ banā.egā āshiyāñ

is shahr ko ujaḌne kī aadat sī ho ga.ī

aise nashe to karne ki aadat si ho gai

ab bar bar marne ki aadat si ho gai

ranj-o-alam to chhoDye KHushiyon mein aaj kal

aankhon mein ashk bharne ki aadat si ho gai

marham hi ban gaya hai mere dard ka sabab

zaKHmon ko yun ubharne ki aadat si ho gai

har choT se main aur nikharta chala gaya

mushkil mein bhi sanwarne ki aadat si ho gai

kya koi aas-pas hai ya hai guman mujhe

yun be-wajah Thaharne ki aadat si ho gai

jis rah se guzarna kabhi nagawar tha

us rah se guzarne ki aadat si ho gai

be-KHauf chal paDe the mohabbat ki rah mein

ab har qadam pe Darne ki aadat si ho gai

kaise chhuDaen rang-e-mohabbat patta nahin

har dil se to utarne ki aadat si ho gai

ab kaun mere dil mein banaega aashiyan

is shahr ko ujaDne ki aadat si ho gai