aise rakhti hai hamein teri mohabbat zinda

aise rakhtī hai hameñ terī mohabbat zinda

jis tarah jism ko sāñsoñ kī harārat zinda

shauq kī raah meñ ik aisā bhī pal aatā hai

jis meñ ho jaatī hai sadiyoñ kī riyāzat zinda

roz ik ḳhauf kī āvāz pe ham uThte haiñ

roz hotī hai dil o jaañ meñ qayāmat zinda

ab bhī anjān zamīnoñ kī kashish khīñchtī hai

ab bhī shāyad hai lahū meñ kahīñ hijrat zinda

tā.at-e-jabr bahut aam huī jaatī thī

ek inkār ne kī rasm-e-baġhāvat zinda

ham to mar kar bhī na bātil ko salāmī deñge

kaise mumkin hai ki kar leñ tirī bai.at zinda

ham meñ soqrāt to koī nahīñ phir bhī 'shahbāz'

zahr pī lete haiñ rakhte haiñ rivāyat zinda

aise rakhti hai hamein teri mohabbat zinda

jis tarah jism ko sanson ki hararat zinda

shauq ki rah mein ek aisa bhi pal aata hai

jis mein ho jati hai sadiyon ki riyazat zinda

roz ek KHauf ki aawaz pe hum uThte hain

roz hoti hai dil o jaan mein qayamat zinda

ab bhi anjaan zaminon ki kashish khinchti hai

ab bhi shayad hai lahu mein kahin hijrat zinda

taat-e-jabr bahut aam hui jati thi

ek inkar ne ki rasm-e-baghawat zinda

hum to mar kar bhi na baatil ko salami denge

kaise mumkin hai ki kar len teri baiat zinda

hum mein soqraat to koi nahin phir bhi 'shahbaz'

zahr pi lete hain rakhte hain riwayat zinda