aise to koi tark sukunat nahin karta

aise to koī tark sukūnat nahīñ kartā

hijrat vahī kartā hai jo bai.at nahīñ kartā

ye log mujhe kis liye dozaḳh se Darā.eñ

maiñ āshiqī kartā huuñ ibādat nahīñ kartā

ham silsila-dāroñ ke ho kyuuñ jaan ke darpai

kāfir use kahiye jo mohabbat nahīñ kartā

lagtā hai yahāñ maut nahīñ aanī kisī ko

is shahr meñ ab koī vasiyyat nahīñ kartā

ye mujh ko batāte haiñ ġhazālān-e-tarah-dār

achchhā vahī rahtā hai jo vahshat nahīñ kartā

'tābish' kā qayāmat se yaqīñ uTh na gayā ho

kuchh din se vo zikr-e-qad-o-qāmat nahīñ kartā

aise to koi tark sukunat nahin karta

hijrat wahi karta hai jo baiat nahin karta

ye log mujhe kis liye dozaKH se Daraen

main aashiqi karta hun ibaadat nahin karta

hum silsila-daron ke ho kyun jaan ke darpai

kafir use kahiye jo mohabbat nahin karta

lagta hai yahan maut nahin aani kisi ko

is shahr mein ab koi wasiyyat nahin karta

ye mujh ko batate hain ghazalan-e-tarah-dar

achchha wahi rahta hai jo wahshat nahin karta

'tabish' ka qayamat se yaqin uTh na gaya ho

kuchh din se wo zikr-e-qad-o-qamat nahin karta