aish-agah gham-shanas raha

aish-āgāh ġham-shanās rahā

jī kabhī ḳhush kabhī udaas rahā

vaqt ne anginat libās diye

phir bhī insān be-libās rahā

us se pūchho ḳhushī ke ehsāsāt

muddatoñ jo ġhamoñ ke paas rahā

maiñ vo sahrā-e-be-sarāb huuñ jo

apne hī lab kī ban ke pyaas rahā

qalb-e-nau meñ ba-faiz-e-vahm-o-gumāñ

har yaqīñ sūrat-e-qayās rahā

hādsoñ ke hujūm meñ pis kar

ġham kā har lamha bad-havās rahā

qatl lamhoñ kā ho rahā thā magar

vaqt be-ḳhauf-o-be-hirās rahā

merā afsāna-e-hayāt 'ahmar'

ban ke har ġham kā iqtibās rahā

aish-agah gham-shanas raha

ji kabhi KHush kabhi udas raha

waqt ne anginat libas diye

phir bhi insan be-libas raha

us se puchho KHushi ke ehsasat

muddaton jo ghamon ke pas raha

main wo sahra-e-be-sarab hun jo

apne hi lab ki ban ke pyas raha

qalb-e-nau mein ba-faiz-e-wahm-o-guman

har yaqin surat-e-qayas raha

hadson ke hujum mein pis kar

gham ka har lamha bad-hawas raha

qatl lamhon ka ho raha tha magar

waqt be-KHauf-o-be-hiras raha

mera afsana-e-hayat 'ahmar'

ban ke har gham ka iqtibas raha