aisi ghaflat ki ibaadat bhi nahin hoti hai

aisī ġhaflat ki ibādat bhī nahīñ hotī hai

aur sitam ye ki nadāmat bhī nahīñ hotī hai

harf-o-ma.anī ke taqaddus ke amiiñ haiñ ham log

ham se lafzoñ kī siyāsat bhī nahīñ hotī hai

ik tire husn ne iz.hār kī jur.at baḳhshī

varna ham se ye himāqat bhī nahīñ hotī hai

TūTte juḌte haiñ jo vaqt kī añgḌā.ī par

aise rishtoñ meñ sadāqat bhī nahīñ hotī hai

tū jo mil jaa.e to hotī hai ḳhushī ham ko magar

tū na ho to tirī chāhat bhī nahīñ hotī hai

daur vo kaisā suhānā thā mire bachpan kā

ab to bachchoñ se sharārat bhī nahīñ hotī hai

ek ham haiñ ki mayassar haiñ tujhe har lamha

aur tujhe thoḌī sī fursat bhī nahīñ hotī hai

ḳhvāb aise jo na ta.abīr ke muhtāj raheñ

aise ḳhvāboñ meñ haqīqat bhī nahīñ hotī hai

jaane kis moḌ pe aa pahuñchā hai rishta apnā

ya.anī bāham to shikāyat bhī nahīñ hotī hai

yuuñ bhī vo mil nahīñ paate haiñ mahīnoñ ham se

is pe ye uzr farāġhat bhī nahīñ hotī hai

ham ne tā-umr adāvat ko nibhāyā lekin

ab ye aalam ki adāvat bhī nahīñ hotī hai

jin kā honā yā na honā rahe yaksāñ be-faiz

aise logoñ kī zarūrat bhī nahīñ hotī hai

ye alag baat vo iqrār-e-mohabbat na kareñ

hameñ iz.hār kī jur.at bhī nahīñ hotī hai

aisi ghaflat ki ibaadat bhi nahin hoti hai

aur sitam ye ki nadamat bhi nahin hoti hai

harf-o-mani ke taqaddus ke amin hain hum log

hum se lafzon ki siyasat bhi nahin hoti hai

ek tere husn ne izhaar ki jurat baKHshi

warna hum se ye himaqat bhi nahin hoti hai

TuTte juDte hain jo waqt ki angDai par

aise rishton mein sadaqat bhi nahin hoti hai

tu jo mil jae to hoti hai KHushi hum ko magar

tu na ho to teri chahat bhi nahin hoti hai

daur wo kaisa suhana tha mere bachpan ka

ab to bachchon se shararat bhi nahin hoti hai

ek hum hain ki mayassar hain tujhe har lamha

aur tujhe thoDi si fursat bhi nahin hoti hai

KHwab aise jo na tabir ke muhtaj rahen

aise KHwabon mein haqiqat bhi nahin hoti hai

jaane kis moD pe aa pahuncha hai rishta apna

yani baham to shikayat bhi nahin hoti hai

yun bhi wo mil nahin pate hain mahinon hum se

is pe ye uzr faraghat bhi nahin hoti hai

hum ne ta-umr adawat ko nibhaya lekin

ab ye aalam ki adawat bhi nahin hoti hai

jin ka hona ya na hona rahe yaksan be-faiz

aise logon ki zarurat bhi nahin hoti hai

ye alag baat wo iqrar-e-mohabbat na karen

hamein izhaar ki jurat bhi nahin hoti hai