ajab bigDe muqaddar ban gae hain

ajab bigḌe muqaddar ban ga.e haiñ

jo dariyā the samundar ban ga.e haiñ

zamīñ se uḌ ke zarre āsmāñ par

mah-o-parvīn-o-aḳhtar ban ga.e haiñ

sar-e-lauh-e-tasavvur kaise kaise

adhūre naqsh paikar ban ga.e haiñ

hameñ baḳhshī hai narmī mausamoñ ne

magar kuchh log patthar ban ga.e haiñ

milā hai yuuñ hameñ ġham kā ḳhazāna

hamāre ashk gauhar ban ga.e haiñ

shab-e-ġham bhūle-bisre chand chehre

charāġh-e-qalb-e-muztar ban ga.e haiñ

unheñ kyā ḳhauf ho 'shāhid' ḳhudā kā

ḳhudā jo is zamīñ par ban ga.e haiñ

ajab bigDe muqaddar ban gae hain

jo dariya the samundar ban gae hain

zamin se uD ke zarre aasman par

mah-o-parwin-o-aKHtar ban gae hain

sar-e-lauh-e-tasawwur kaise kaise

adhure naqsh paikar ban gae hain

hamein baKHshi hai narmi mausamon ne

magar kuchh log patthar ban gae hain

mila hai yun hamein gham ka KHazana

hamare ashk gauhar ban gae hain

shab-e-gham bhule-bisre chand chehre

charagh-e-qalb-e-muztar ban gae hain

unhen kya KHauf ho 'shahid' KHuda ka

KHuda jo is zamin par ban gae hain