ajab hi Dhang se ab anjuman-arai hoti hai

ajab hī Dhañg se ab anjuman-ārā.ī hotī hai

jahāñ par bhī raheñ ham saath meñ tanhā.ī hotī hai

fatūhāt-e-dil-o-jāñ par yuuñ mat itrā mire lashkar

ki is maidān meñ fil-faur hī paspā.ī hotī hai

ye mela vaqt kā hai haath us ke haath meñ rakhnā

bichhaḌ jaa.eñ yahāñ to phir kahāñ yakjā.ī hotī hai

ham aise kuchh bhī kar leñ un kī tah ko pā nahīñ sakte

amīr-e-shahr kī bātoñ meñ vo gahrā.ī hotī hai

salāsat se bayāñ ahvāl-e-dil karnā hai ik ḳhūbī

basā-auqāt chup rahnā bhī to dānā.ī hotī hai

zabān-e-ḳhalq goyā.ī ke gauhar to luTātī hai

laboñ par jo nahīñ aatī vahī sachchā.ī hotī hai

ajab hi Dhang se ab anjuman-arai hoti hai

jahan par bhi rahen hum sath mein tanhai hoti hai

fatuhat-e-dil-o-jaan par yun mat itra mere lashkar

ki is maidan mein fil-faur hi paspai hoti hai

ye mela waqt ka hai hath us ke hath mein rakhna

bichhaD jaen yahan to phir kahan yakjai hoti hai

hum aise kuchh bhi kar len un ki tah ko pa nahin sakte

amir-e-shahr ki baaton mein wo gahrai hoti hai

salasat se bayan ahwal-e-dil karna hai ek KHubi

basa-auqat chup rahna bhi to danai hoti hai

zaban-e-KHalq goyai ke gauhar to luTati hai

labon par jo nahin aati wahi sachchai hoti hai