ajab mushkil ki dil ka haal aisa ho gaya hai

ajab mushkil ki dil kā haal aisā ho gayā hai

sabhī ab pūchhte haiñ mujh se ye kyā ho gayā hai

maiñ ye samjhā ki ġham kā ab mudāvā ho gayā hai

kuredā zaḳhm to ye aur taaza ho gayā hai

kabhī fursat mile to ḳhud se maiñ bāteñ karūñgā

mujhe ḳhud se mile bhī to zamāna ho gayā hai

magar ab sochtā huuñ toḌ duuñ saare marāsim

magar dil bhī tire ġham se shanāsā ho gayā hai

mirī barbād hastī kā nazāra dekhne ko

vo aa.e aur ġham meñ phir izāfa ho gayā hai

isī dariyā meñ ab ḳhud ko Dubonā chāhtā huuñ

ki is dil kā talātum meñ kināre ho gayā hai

chalo bhī 'qalb' ab tum dūsrā dekho Thikānā

ki is bastī meñ apnā sab parāyā ho gayā hai

ajab mushkil ki dil ka haal aisa ho gaya hai

sabhi ab puchhte hain mujh se ye kya ho gaya hai

main ye samjha ki gham ka ab mudawa ho gaya hai

kureda zaKHm to ye aur taza ho gaya hai

kabhi fursat mile to KHud se main baaten karunga

mujhe KHud se mile bhi to zamana ho gaya hai

magar ab sochta hun toD dun sare marasim

magar dil bhi tere gham se shanasa ho gaya hai

meri barbaad hasti ka nazara dekhne ko

wo aae aur gham mein phir izafa ho gaya hai

isi dariya mein ab KHud ko Dubona chahta hun

ki is dil ka talatum mein kinare ho gaya hai

chalo bhi 'qalb' ab tum dusra dekho Thikana

ki is basti mein apna sab paraya ho gaya hai