ajab tarah ka shab-e-hijr inqalab raha

ajab tarah kā shab-e-hijr inqalāb rahā

kabhī sukūn kabhī dil ko iztirāb rahā

javāb jin kā na thā un meñ lā-javāb rahā

kisī kā husn hazāroñ meñ intiḳhāb rahā

kiyā na ahl-e-ma.āsī kā sāmnā dam-e-hashr

ḳhudā ke fazl se kosoñ alag itaab rahā

umiid diid kī niklegī kis tarah dam-e-hashr

agar vahāñ bhī vo jalva tah-e-naqāb rahā

muhāl hogā zamāne ko ek dam bhī sukūn

agar yūñhī dil-e-muztar kā iztirāb rahā

maqām-e-rāhat-o-ārām go the dair-o-haram

kisī jagah na dil-e-ḳhānumāñ-ḳharāb rahā

shumār ho na sakā hashr meñ ye ḳhuub huā

hamārā nāma-e-a.amāl be-hisāb rahā

nigāh lutf-o-ināyat se āshnā na huī

kisī pe qahr kisī par tirā itaab rahā

savāl radd hue 'mas.ūd' sab muqaddar se

nahīñ nahīñ mirī har baat kā javāb rahā

ajab tarah ka shab-e-hijr inqalab raha

kabhi sukun kabhi dil ko iztirab raha

jawab jin ka na tha un mein la-jawab raha

kisi ka husn hazaron mein intiKHab raha

kiya na ahl-e-maasi ka samna dam-e-hashr

KHuda ke fazl se koson alag itab raha

umid did ki niklegi kis tarah dam-e-hashr

agar wahan bhi wo jalwa tah-e-naqab raha

muhaal hoga zamane ko ek dam bhi sukun

agar yunhi dil-e-muztar ka iztirab raha

maqam-e-rahat-o-aram go the dair-o-haram

kisi jagah na dil-e-KHanuman-KHarab raha

shumar ho na saka hashr mein ye KHub hua

hamara nama-e-amal be-hisab raha

nigah lutf-o-inayat se aashna na hui

kisi pe qahr kisi par tera itab raha

sawal radd hue 'masud' sab muqaddar se

nahin nahin meri har baat ka jawab raha