ajab Thahraw tha jis mein masafat ho rahi thi

ajab Thahrāv thā jis meñ masāfat ho rahī thī

ravāna bhī nahīñ thā aur hijrat ho rahī thī

banāyā jā rahā thā canvas par zard sūraj

ubhārā jā rahā thā naqsh hairat ho rahī thī

kahīñ jaatā nahīñ thā maiñ kahīñ aatā nahīñ thā

yaqīñ aatā nahīñ thā aisī hālat ho rahī thī

mirā us ke binā to jī zarā lagtā nahīñ thā

udāsī lauT aa.ī thī masarrat ho rahī thī

charāġh ek ek kar ke raushnī karne lage the

mujhe in sab charāġhoñ se mohabbat ho rahī thī

nayā ik baaġh thā aur is ko kaaTā jā rahā thā

parindoñ ko abhī peḌoñ kī aadat ho rahī thī

bichhaḌ jaane kā kuchh kuchh ḳhauf bhī hone lagā thā

mujhe us ke ravayye par bhī hairat ho rahī thī

nahīñ thī zindagānī bhī vahāñ hasab-e-tamannā

mohabbat bhī vahāñ hasb-e-zarūrat ho rahī thī

ye aañsū to na the jo bah rahe the hijr-e-gul meñ

ye ḳhushbū thī jo āñkhoñ se rivāyat ho rahī thī

mujhe ḳhud meñ koī sahrā mayassar aa gayā thā

uḌaa.ī jā rahī thī ḳhaak vahshat ho rahī thī

mukammal bad-gumānī ho ga.ī thī us ko 'sayyad'

palaTne meñ mujhe bhī ab suhūlat ho rahī thī

ajab Thahraw tha jis mein masafat ho rahi thi

rawana bhi nahin tha aur hijrat ho rahi thi

banaya ja raha tha canwas par zard suraj

ubhaara ja raha tha naqsh hairat ho rahi thi

kahin jata nahin tha main kahin aata nahin tha

yaqin aata nahin tha aisi haalat ho rahi thi

mera us ke bina to ji zara lagta nahin tha

udasi lauT aai thi masarrat ho rahi thi

charagh ek ek kar ke raushni karne lage the

mujhe in sab charaghon se mohabbat ho rahi thi

naya ek bagh tha aur is ko kaTa ja raha tha

parindon ko abhi peDon ki aadat ho rahi thi

bichhaD jaane ka kuchh kuchh KHauf bhi hone laga tha

mujhe us ke rawayye par bhi hairat ho rahi thi

nahin thi zindagani bhi wahan hasab-e-tamanna

mohabbat bhi wahan hasb-e-zarurat ho rahi thi

ye aansu to na the jo bah rahe the hijr-e-gul mein

ye KHushbu thi jo aankhon se riwayat ho rahi thi

mujhe KHud mein koi sahra mayassar aa gaya tha

uDai ja rahi thi KHak wahshat ho rahi thi

mukammal bad-gumani ho gai thi us ko 'sayyad'

palaTne mein mujhe bhi ab suhulat ho rahi thi