ajal bhi sath thi har lamha zindagi ki tarah

ajal bhī saath thī har lamha zindagī kī tarah

tumhāre ahd meñ jiinā thā ḳhud-kushī kī tarah

añdherī raat meñ jangal kī ḳhāmushī kī tarah

ye kaun paas se guzrā hai aap hī kī tarah

chaman ko saikḌoñ pairāhan-e-bahār mile

magar khilā na koī zaḳhm-e-dil kalī kī tarah

na e'timād-e-karam hai na aitabār-e-vafā

hai dostī bhī zamāne kī dushmanī kī tarah

kuchh aise log bhī haiñ jin ko is zamāne meñ

karāheñ hotī haiñ mahsūs naġhmagī kī tarah

na ham-ḳhayāl hai koī na āshnā merā

maiñ apne shahr meñ phirtā huuñ ajnabī kī tarah

sunā.ūñ kis ko ġham-e-dil kī dāstāñ 'azmat'

milā na dushman-e-jāñ koī aadmī kī tarah

ajal bhi sath thi har lamha zindagi ki tarah

tumhaare ahd mein jina tha KHud-kushi ki tarah

andheri raat mein jangal ki KHamushi ki tarah

ye kaun pas se guzra hai aap hi ki tarah

chaman ko saikDon pairahan-e-bahaar mile

magar khila na koi zaKHm-e-dil kali ki tarah

na e'timad-e-karam hai na aitabar-e-wafa

hai dosti bhi zamane ki dushmani ki tarah

kuchh aise log bhi hain jin ko is zamane mein

karahen hoti hain mahsus naghmagi ki tarah

na ham-KHayal hai koi na aashna mera

main apne shahr mein phirta hun ajnabi ki tarah

sunaun kis ko gham-e-dil ki dastan 'azmat'

mila na dushman-e-jaan koi aadmi ki tarah