ajib chaal koi tir chal gae apne

'ajīb chaal koī tiir chal ga.e apne

'adū ko us ke lage haiñ mujhe mire apne

koī samajhtā nahīñ hai mire masā.il ko

batā rahe haiñ sabhī mujh ko tajrabe apne

tū kar zarūr judā.ī ko ‘aks-band magar

maiñ pahle yaad to kar luuñ mukālme apne

maiñ tā-hayāt mohabbat kā ab nahīñ qaa.il

har ek 'umr ke hote haiñ mas.ale apne

koī mujhe na batā.e vo ab nahīñ merā

mujhe 'azīz bahut haiñ muġhālate apne

kise hai thoḌī mohabbat kise ziyāda hai

tumheñ bhī yaad haiñ kyā vo muqāble apne

maiñ ḳhud sikhātā huuñ auroñ ko gur mohabbat ke

tum apne paas rakho dost mashvare apne

kabhī kabhī to ye lagtā hai koī dariyā huuñ

maiñ jis tarah se badaltā huuñ rāste apne

vo jin ke dukh kā mudāvā koī nahīñ hotā

vo sab meñ bāñTte rahte haiñ ‘ārize apne

maiñ pīchhe chhoḌ chukā huuñ 'adam kī had ko bhī

yahāñ se aage haiñ āsān marhale apne

jo de rahe haiñ mujhe aane vaale kal kī ḳhabar

zarā banā ke dikhā.eñ to zā.iche apne

'ajib chaal koi tir chal gae apne

'adu ko us ke lage hain mujhe mere apne

koi samajhta nahin hai mere masail ko

bata rahe hain sabhi mujh ko tajrabe apne

tu kar zarur judai ko ‘aks-band magar

main pahle yaad to kar lun mukalme apne

main ta-hayat mohabbat ka ab nahin qail

har ek 'umr ke hote hain masale apne

koi mujhe na batae wo ab nahin mera

mujhe 'aziz bahut hain mughaalate apne

kise hai thoDi mohabbat kise ziyaada hai

tumhein bhi yaad hain kya wo muqable apne

main KHud sikhata hun auron ko gur mohabbat ke

tum apne pas rakho dost mashware apne

kabhi kabhi to ye lagta hai koi dariya hun

main jis tarah se badalta hun raste apne

wo jin ke dukh ka mudawa koi nahin hota

wo sab mein banTte rahte hain ‘arize apne

main pichhe chhoD chuka hun 'adam ki had ko bhi

yahan se aage hain aasan marhale apne

jo de rahe hain mujhe aane wale kal ki KHabar

zara bana ke dikhaen to zaiche apne