ajib haal hai sahra-nashin hain ghar wale

ajiib haal hai sahrā-nashīñ haiñ ghar vaale

gharoñ meñ baiTh ga.e haiñ idhar-udhar vaale

navāh-e-jism nahīñ garche regzār se kam

yahāñ bhī ḳhitte ka.ī haiñ hare shajar vaale

agarche shor bahut hai dar-e-duā pe magar

zabāneñ band kiye baiThe haiñ asar vaale

hai rāh-e-jāñ yūñhī sunsān ek muddat se

na gard uḌī na dikhā.ī diye safar vaale

baġhair aañkh ke chehroñ kā ab chalan hai yahāñ

vo din ga.e ki huā karte the nazar vaale

abhī maiñ shahr ko sahrā banā.e detā huuñ

ki mere haath bhī kuchh kam nahīñ hunar vaale

simaT ke rah ga.e ab chand sā.atoñ meñ 'hasan'

yahī the kaam kisī vaqt umr-bhar vaale

ajib haal hai sahra-nashin hain ghar wale

gharon mein baiTh gae hain idhar-udhar wale

nawah-e-jism nahin garche regzar se kam

yahan bhi KHitte kai hain hare shajar wale

agarche shor bahut hai dar-e-dua pe magar

zabanen band kiye baiThe hain asar wale

hai rah-e-jaan yunhi sunsan ek muddat se

na gard uDi na dikhai diye safar wale

baghair aankh ke chehron ka ab chalan hai yahan

wo din gae ki hua karte the nazar wale

abhi main shahr ko sahra banae deta hun

ki mere hath bhi kuchh kam nahin hunar wale

simaT ke rah gae ab chand saaton mein 'hasan'

yahi the kaam kisi waqt umr-bhar wale